आज देखि ट्रायल शुरु, परीक्षणकालीन लाइसेन्स पनि वितरण गरिने

काठमाडौं – आज देखि सवारी चालक अनुमति पत्र (लाइसेन्स)को ट्रायल परीक्षा प्रारम्भ भएको छ । विश्व व्यापीरुपमा फैलिएको कोरोनाको महामारीका कारण रोकिएको लाइसेन्सको ट्रायल भदौ २० गतेदेखि सुरु गर्न देशैभरको यातायात कार्यालयमा विभागले पत्राचार गरिसकेको बताएको छ । यसै अनुसार विभिन्न कार्यालयले सूचना प्रकाशित गरेका छन् ।

विभागले लाइसेन्सको आवेदन दिएका आवेदकको ट्रायल लिखित र ट्रायल परीक्षा सकेपछि मात्रै नयाँ आवेदन खुलाउने बताएको छ । लाइसेन्सको लागि आवेदन दिनेहरूको संख्या देशभरबाट ६ लाख पुगेका छन् ।

सो आवेदकको परीक्षा नसकी नयाँ आवेदन नखुलाउने विभागको तयारी छ । लिखित र ट्रायल परीक्षाका लागि आवेदकले अनलाइनमार्फत आवेदन दिन सक्ने व्यवस्था गर्ने विभागले जनाएको छ ।

यातायात व्यवस्था विभागका महानिर्देशक नमराज घिमिरेले सवारी चालक अनुमतिपत्र प्राप्त गर्न ट्रायलमा उत्तीर्ण गरेकाको लागि र नवीकरणका लागि आवेदन दिएकालाई परीक्षणकालीन (प्रोभिजनल) सवारी चालक अनुमतिपत्र वितरण सुरु गरिएको जानकारी दिए ।

उनका अनुसार शुक्रबारबाट कार्यान्वयनमा ल्याइएको यो प्रावधान अन्तर्गत ललितपुरको एकान्तकुना र महोत्तरीको बर्दिबासबाट परीक्षणकालीन सवारी चालक अनुमतिपत्र वितरण सुरु गरिएको छ । अब यसप्रकारको सवारी चालक अनुमतिपत्र वितरण कार्य १९ वटै यातायात व्यवस्था कार्यालयबाट गर्ने तयारी समेत भइरहेको छ ।