टाटाले सार्वजनिक ग-यो पन्च एसयूभी, म्याग्नाइट र काइगरसँग प्रतिस्पर्धा हुने

टाटा मोटर्सले भारतमा पहिले देखि नै प्रतीक्षामा रहेको नयाँ माइक्रो एसयूभी सार्वजनिक गरेको छ । एचबीएक्स वा हर्नबिल नाम हुने पहिले देखि नै अनुमान गरिएको उक्त एसयूभीको नाम भने ‘टाटा पन्च’ राखिएको छ ।

आगामी फेस्टिभ सिजनमा लन्च गरिने सो माइक्रो एसयूभी टाटाको सबैभन्दा सानो एसयूभी हुनेछ । कम्पनीको लाइनअपमा यसलाई नेक्सन कम्प्याक्ट एसयूभी भन्दा तल राखिएको छ ।

टाटा पन्च पहिलो एसयूभी हो, जसलाई अल्फा–एआरसी अर्थात एजाइल लाइट फ्लेक्जिबल एड्भान्स्ड आर्किटेक्चरमा बनाइएको छ । यसलाई इम्प्याक्ट २.० डिजाइन ल्यांग्वेज अन्तर्गत विकसित गरिएको छ । युवाहरुलाई आकर्षित गर्नका लागि डिजाइन गरिएको यो एसयूभी सहरी क्षेत्रका लागि हाइवेमा समेत निकै नै स्पोर्टी देखिने छ ।

सन् २०२० को अटो एक्सपोमा यसलाई एचबीएक्स कन्सेप्ट माइक्रो एसयूभीको रुपमा प्रदर्शन गरिएको थियो । हाल प्रोडक्सन मोडलमा टाटा पन्चको नाममा आएको यो एसयूभी कन्सेप्ट मोडल भन्दा धेरै फरक देखिएको छैन ।

हालै सार्वजनिक गरिएको तस्बिर अनुसार कन्सेप्टको फ्रन्ट बम्पर र बडी क्लेडिङलाई टोन्ड डाउन गरिएको छ । यद्यपि स्क्वायर ह्विल आर्च र अपराइट स्टान्सले यसलाई एक एसयूभी लुक दिएको छ ।

पन्च एसयूभीमा १६ इन्चको स्टाइलिस ह्विल दिइएको छ । सानो भएर पनि यो एसयूभी टाटाको एच फाइभ र सफारी जस्तै फेमिली डिजाइन ल्यांग्वेज जस्तो देखिन्छ । यी एसयूभीमा जस्तै पन्चमा पनि स्प्लिट हेडल्याम्प र टाटाको ह्युमानिटी लाइन ग्रिल उपलब्ध छ ।

पन्चको इन्टेरियरको वारेमा जानकारी सार्वजनिक गरिएको छैन । यद्यपि यसमा कन्सेप्ट मोडल जस्तै धेरै फिचर हुनेछन् । यसमा ७ इन्चको टचस्क्रिन इन्फोटेनमेन्ट सिस्टम, थ्री स्पोक फ्ल्याट बटम स्टेयरिङ ह्विल, एचभीएसी कन्ट्रोल, डिजिटल टेकोमिटर र एनालग स्पिडोमिटरका साथ पार्ट डिजिटल इन्स्ट्रयुमेन्ट क्लस्टर जस्ता धेरै फिचर हुनेछन् ।

सो एसयूभी १.२ लिटरका दुई इन्जिन अप्सनमा उपलब्ध हुने अनुमान गरिएको छ । टाटा टियागो र टिगोरमा उपलब्ध इन्जिन जस्तै एउटामा नेचुरल्ली एस्पिरेटेड इन्जिन हुनेछ भने अर्को टर्बोचार्ज्ड इन्जिन हुनेछ ।

यसको मूल्य भारतीय बजारमा ५ लाख भारु भन्दा कम हुन सक्ने बताइएको छ । टाटा पन्चको प्रतिस्पर्धा हुन्डाईको बजारमा आउँदै गरेको माइक्रो एसयूभी क्यास्पर र मारुती सुजुकी इग्निसका साथै इन्ट्री लेवलका एसयूभी निसान म्याग्नाइट र रेनो काइगरसँग हुनेछ ।

भारतमा फेस्टिभ सिजनमा लन्च भए पश्चात नेपाली बजारमा समेत उक्त माइक्रो एसयूभी भित्रिने अनुमान गर्न सकिन्छ ।