स्थगित भयो नाडाको ४५औं वार्षिक साधारण सभा तथा निर्वाचन

काठमाडौं – आगामी भाद्र २५ गते हुने भनिएको नाडा अटोमोबाइल्स एसोसिएसन अफ नेपालको ४५औं वार्षिक साधारण सभा तथा २१औं निर्वाचन स्थगित भएको छ ।

सो साधारण सभा सम्पन्न गर्नका लागि अनुमति पाउन मिति गत साउन १९ मा काठमाडौ जिल्ला प्रशासन कार्यालयमा पत्राचार गरिएकोमा सो कार्यालयले कोभिड १९ को संक्रमण दर अझ उच्च हुन गई तेश्रो लहर समेत आउन सक्ने भन्दै सभा र सम्मेलन आदि गर्न नपाउने विषयमा सार्वजनिक सूचना जारी गरेको सन्दर्भमा सो साधारण सभा तथा निर्वाचन स्थगित गरिएको नाडाले जनाएको छ ।

नाडाले गत २०७८ साल साउन १५ गते बसेको नाडाको केन्द्रीय कार्य समितिको १३औं बैठकले नाडाको ४५औं वार्षिक साधारण सभा तथा २१ औं निर्वाचन २०७८ साल भाद्र २५ गते होटेल सोल्टी, काठमाडौमा सम्पन्न गर्ने निर्णय गरेको थियो ।