यस्तो छ थर्ड जेनेरेसन हुन्डाई आई२०, लुक्स, डिजाइन र फिचर्समा व्यापक परिवर्तन

प्रिमियम ह्याचब्याक सेग्मेन्टमा सर्बाधिक रुचाइएको हुन्डाई आई२० को नयाँ जेनेरेसन नेपाल भित्रिएको छ । यसअघिको सेकेन्ड जेनेरेसन इलाईट आई२० लाई थप परिमार्जन र परिस्कृत गरी थर्ड जेनेरेसन आई२० भित्र्याइएको हो । इन्जिन, पावर तथा पर्फमेन्स पुरानै मोडलसरह रहेपनि नयाँ कारको लुक्स, डिजाइन र फिचर्समा व्यापक फेरबदल गरिएको छ ।

लुक्स तथा डिजाइन
इन्डियन कार अफ द इयर २०२१ अवार्ड प्राप्त गर्न सफल नयाँ कारको डिजाइन पहिलेको तुलनामा निकै नै आकर्षक र स्पोर्टी तवरबाट गरिएको छ । फ्रेमरहित ग्रिल र सी–पिल्लरयुक्त क्रोमका कारण यो पहिलेको तुलनामा थप स्पोर्टी र आकर्षक देखिएको छ । गाडीको पछिल्लो भागमा दिइएको जेड आकारको एलईडी टेललाइट र पियानो ब्ल्याक कलरको विन्डस्क्रिनले नयाँ आई२० को लुक्समा निखरता दिएको छ ।

नयाँ आई२० को ग्रिल पुरानो मोडलको तुलनमा निकै नै आकर्षक र सार्प देखिन्छ । डीआरएल सहितको स्लिक एलईडी हेडल्याम्पले यसको कासकेड ग्रिलमा थप निखरता प्रदान गरेको छ । जसका कारण यो कार पुरानो मोडलको तुलनामा बढी नै स्पोर्टी देखिएको हो ।

भेन्युमा प्रयोग गरिएको १७ इन्चको डाइमन्ड कट अलोय ह्विलले यो कारलाई थप बोल्ड देखाएको छ । यो कारको डिजाइन युरोपमा गरिएका कारण समग्र डिजाइन युरोपियन स्ट्यान्डर्डमा आधारित छ । पहिलेको तुलनमा ३० एमएम बढी चौडा यो कार ५ एमएम बढी लामो समेत छ । त्यसैगरी यसको ह्विलबेस समेत १० एमएमले बढी लामो छ । नयाँ आई२० पुरानो मोडलको तुलनामा केही ठूलो र फराकिलो समेत देखिन्छ ।

इन्टेरियर एन्ड फिचर्स
नयाँ आई२० को भित्री बनावट समेत निकै नै आकर्षक र स्पोर्टी रहेको छ । पहिलेको तुलनामा यसको इन्टेरियर पुरै परिबर्तन गरिएको छ । नयाँ कारको इन्टेरियर ब्ल्याक कलर थिममा समायोजन गरिएको छ । जबकी यसअघिको मोडलको इन्टेरियर डुअल कलर टोनमा आधारित थियो ।

यो कारको क्याविनलाई भब्य र आरामदायी बनाउन कम्पनीले कुनै कन्जुस्याई गरको देखिदैन । पछाडिको सिटमा बस्नेहरुका लागि आरामदायी यात्राको प्रत्याभूति गराउन पहिलेको तुलनामा झन्डै ४० एमएम बढी लेग स्पेस दिइएको छ । यो कारमा ५ जना यात्रुले आरामदायी यात्र गर्न सक्नेछन् ।

यो कारको बुट स्पेस समेत पुरानो मोडलको तुलनामा २५ लिटरले बढाएर ३५१ लिटर पु¥याइएको छ । जुन सेग्मेन्टमै सर्बाधिक बढी क्षमता हो । पुरानो मोडलमा ७ इन्चको इन्फोटेनमेन्ट सिस्टम जडान भएकोमा यो नयाँ कारमा भने १०.२५ इन्चको अत्याधुनिक इन्फोटेनमेन्ट सिस्टम उपलब्ध गराइएको छ जहाँ चालकले एप्पल कारप्ले र एन्ड्रोइड अटोको सपोर्ट लिन सक्छन् ।

इन्जिन तथा पावर
नयाँ कारमा १.२ लिटर क्षमताको कप्पा इन्जिन जडान गरिएको छ । जसको अधिकतम पावर ८२ बीएचपी र टर्क ११५ एनएम रहेको छ । जुन यसअघिको पुरानो मोडल सरह हो । पुरानो मोडलमा बीएस४ इन्जिन जडान भएकोमा यो कारमा भने बीएस६ इन्जिन जडान गरिएको छ । जसका कारण यसले प्रदान गर्ने माइलेज केही बढी छ ।

कम्पनीका अनुसार नयाँ आई२० ले २०.३५ किलोटिर माइलेज प्रदान गर्ने दाबी गरिएको छ । जबकी पुरानो मोडलले १९.८ किलोमिटर माइलेज प्रदान गर्ने दाबी गरिएको थियो । नयाँ कारमा ५ स्पिड म्यानुअल गियर बक्स जडान गरिएको छ भने यसलाई फ्रन्ट ह्विल ड्राइभट्रेनमा गुडाउन सकिन्छ ।

सेफ्टी फिचर्स
नयाँ कारमा पुरानो आई२० मा उपलब्ध गराइएको सेफ्टी फिचर्समा अपग्रेड गरिएको छ । जस्तो पुरानो कारमा एबीएस, ६ एयरब्याग र चारवटै सिटमा सिटबेल्ट वार्निङ ल्याम्प उपलब्ध गराइएकोमा त्यसमा थप गरी नयाँ कारमा इलेक्ट्रोनिक स्ट्याबिलिटी कन्ट्रोल, टायर प्रेसर मोनिटरिङ सिस्टम र हिल एसिस्ट कन्ट्रोल सिस्टम समेत थप गरिएको छ ।

यसको अतिरिक्त यसमा हुन्डाई मोटर्सको स्मार्ट सेन्स सेफ्टी प्याकेज समेत थप गरिएको छ । जसले सडक छेउमा हिड्ने पैदलयात्री र साइकलयात्रीको सुरक्षालाई प्रत्याभुत गराउँछ । साथै यसमा नेभिगेसनमा आधारित स्मार्ट क्रुज कन्ट्रोल थप गरिएको छ ।

मूल्य तथा प्रतिस्पर्धा
नयाँ आई२० पुरानो मोडलको तुलनामा ४ लाख रुपैयाँसम्मले महंगो देखिएको छ । यसअघि इलाईट आई२०को म्याग्ना भेरिएन्टको मुल्य ३३ लाख ५६ हजार कायम गरिएकोमा नयाँ कारको सोही भेरिएन्टको मूल्य ३६ लाख ९६ हजार रुपैयाँ निर्धारण गरिएको छ । त्यसैगरी पुरानो मोडल इलाईट आई२० स्पोर्टज्को मूल्य ३७ लाख ९६ हजार रहँदै आएकोमा सोही भेरिएन्टको नयाँ मोडलको ४१ लाख ९६ हजार रुपैयाँ निर्धारण गरिएको हो । नेपाली बजारमा यो कारले मारुती बलेनो, फक्सवागन पोलो, होन्डा ज्याज र टाटा अल्ट्रोजसँग प्रतिस्पर्धा गर्नुपर्नेछ ।