चीनले बनायो विश्वको सबैभन्दा तीव्र गतिको ट्रेन, ६०० किलोमिटर प्रति घन्टा स्पिड

चीनले विश्वको सबैभन्दा तीव्र गतिको म्याग्लेभ ट्रेनको सुरुवात गरेको छ । सो ट्रेन ६०० किलोमिटर प्रति घन्टाको स्पिडमा कुद्ने क्षमताको रहेको छ । सो ट्रेनको सुरुवात सार्वजनिक रुपमा चीनको तटीय शहर किंगदाओमा भएको छ ।

हाई स्पिड म्याग्लेभ ट्रेनको परियोजनाको सुरुवात अक्टोबर २०१६ मा भएको थियो । उक्त ट्रेनको प्रोटोटाइप २०१९ मा बनाइएको थियो र यसको सफल परीक्षण २०२० मा भएको थियो । सो ट्रेनमा १० डब्बा रहेको छ । यसको हरेक डब्बामा १०० जना यात्रीको लागि सिट क्षमता रहेको छ ।

सो ट्रेनले पहिले १५०० किलोमिटरको दायरामा यात्रा सुरुवात गर्नेछ । म्याग्लेभ ट्रेन बिजुलीबाट बनेको चुम्बकीय तरङ्गको सहारामा चल्ने गर्छ । ट्रेन र पटरियाको बीचमा सम्पर्क नभएको कारणले गर्दा सो ट्रेनको स्पिड तीव्र भएको हो ।

यस्तो खालको ट्रेन निकै महँगो हुने गर्छ, जसको कारणले गर्दा यो निकै कम देशमा मात्र रहेको छ । सो ट्रेनको प्रयोग चीन, जापान, दक्षिण कोरिया, फ्रान्स र स्पेन जस्ता देशले गर्ने गरेका छन् ।

हाल सो ट्रेन मेगासिटी शांघाईको हवाई अड्डादेखि शहरको लागि मात्र प्रयोगमा ल्याइएको छ । चीनमा कुनै इन्टरसिटी वा अन्तर प्रान्त म्याग्लेभ लाइन रहेको छैन । रिपोर्टका अनुसार हाल शांघाई र चेंगदु जस्ता सहरमा यसको लागि अनुसन्धान भइरहेको छ ।

सो ट्रेनको ब्रेकिङ सिस्टम कुशल बनाइएको छ । जसको ब्रेकिङ दुरी १६ किलोमिटरबाट घटेर १० किलोमिटरमा सीमित भएको छ । उक्त ट्रेनमा यात्राको क्रममा इन्टरनेट र वायरलेस चार्जिङको पनि सुविधा रहेको छ ।