टाटा मोटर्सले २०२५ सम्म १० नयाँ इलेक्ट्रिक कार बजारमा ल्याउने

टाटा मोटर्सले २०२५ सम्ममा १० नयाँ इलेक्ट्रिक कार लन्च गर्ने घोषणा गरेको छ । सो कार विशेषगरी भारतीय बजारको लागि तयार गरिनेछ । हाल कम्पनीले इलेक्ट्रिक कार टाटा नेक्सन बिक्री गरिरहेको छ ।

टाटा मोटर्सका चेयरम्यान एन चन्द्रशेखरनले भारतमा बिजनेस मोडललाई अझै टिकाउ बनाउनका लागि १० नयाँ इलेक्ट्रिक कार बजारमा ल्याउने योजना बनाएको बताए । सवारी साधनको पोर्टफोलियो विस्तारका लागि युरोपमा पनि बिक्री गर्ने र ब्याट्री निर्माता कम्पनीसँग सहकार्यको खोजीमा रहेको उनको भनाइ छ । उनले यसका लागि चार्जिङ पूर्वाधारको निर्माण समेत गरिने बताए ।

यसका लागि एक अटोनोमस सफ्टवेयर र इन्जिनियरिङ भर्टिकल तयार गर्ने योजना समेत रहेको छ ।

टाटा मोटर्सका अनुसार नेक्सन इलेक्ट्रिक कार २०२० जनवरी देखि हालसम्म ४ हजार युनिट बिक्री भइसकेको छ । नेक्सन ईभी २०२०–२१ मा भारतमा सबैभन्दा बढी बिक्री हुने इलेक्ट्रिक कार हो ।

भारतमा नेक्सन इलेक्ट्रिक कार निकै लोकप्रिय रहेको छ । सो कारको मागलाई ध्यानमा राखेर कम्पनीले इलेक्ट्रिक कारको पोर्टफोलियो बढाउने निर्णय गरेको थियो । सो कार केही दिन भित्रै नेपाली बजारमा समेत उपलब्ध हुनेछ ।

कम्पनीले ज्न्यगुआर ल्यान्डरोभर ब्रान्डमा पनि २०३० को अन्त्य सम्ममा सबै गाडी इलेक्ट्रिक बनाउने लक्ष्य राखेको छ ।