किया निरो ईभीको नयाँ मूल्य सार्वजनिक, यस्तो हुनेछ मूल्य

काठमाडौं – कियाको नेपालका लागि आधिकारिक वितरक कन्टिनेन्टल ट्रेडिङ इन्टरप्राइजेजले नेपाली बजारमा बिक्रीका लागि उपलब्ध हुने इलेक्ट्रिक कार निरो ईभीको नयाँ मूल्य सार्वजनिक गरेको छ ।

कम्पनीका अनुसार निरो ईभीको मूल्य ६९ लाख ९० हजार रुपैयाँ तोकिएको छ । गत वर्षको बजेट भन्दा पहिले यसको मूल्य ६६ लाख ९० हजार रुपैयाँ थियो । पछि सरकारले भारी मात्रामा अन्तःशुल्क र कर बढाए पछि कम्पनीले नयाँ मूल्य सूची नै सार्वजनिक गरेको थिएन ।

निरो ईभीमा १५० वाटको इलेक्ट्रिक मोटर छ । पहिले १५० वाट सम्मको मोटर भएको इलेक्ट्रिक कारमा १० प्रतिशत भन्सार शुल्क भएकोमा हाल १५ प्रतिशत तोकिएको छ । यसले गर्दा निरो ईभीको मूल्य पनि केही बढ्न गएको कन्टिनेन्टल ट्रेडिङका असिस्टेन्ट जनरल म्यानेजर अनिश लामिछानेले बताए ।

उक्त कारले ७.८ सेकेन्डमा शून्यबाट १०० किलोमिटरको गति तय गर्न सक्ने कम्पनीको दाबी छ ।

अगाडिको ग्रिलमा कम्बाइन चार्जिङ सिस्टम दिइएको उक्त कारलाई डिसी फास्टचार्जरबाट ८० प्रतिशत चार्ज गर्न ७५ मिनेट लाग्छ ।

एक पटकको फुलचार्जमा उक्त गाडीले ४ सय ८० किलोमिटर माइलेज दिन्छ । कुनै इलेक्ट्रिक कारले यति धेरै माइलेज दिनु निकै नै उपलब्धिमूलक हो ।