हार्ले डेभिडसनका सबै इलेक्ट्रिक मोटरसाइकल अब लाइभवायर ब्रान्डमा आउने, भर्चुअल हेडअफिस हुने

क्रुजर बाइकका लागि अन्तर्राष्ट्रिय बजारमा प्रचलित अमेरिकी कम्पनी हार्ले डेभिडसनले आफ्नो नयाँ अल इलेक्ट्रिक मोटरसाइकल ब्रान्ड ‘लाइभवायर’ लन्च गरेको छ । विश्व बजारमा बढिरहेको इलेक्ट्रिक सवारी साधन बजारमा पकड कायम राख्नका लागि हार्लेले नयाँ ब्रान्ड लन्च गरेको हो । अब आगामी दिनमा आउने हार्लेका सबै इलेक्ट्रिक मोटरसाइकल लाइभवायर ब्रान्ड अन्तर्गत लन्च हुनेछन् ।

हार्ले डेभिडसनले आफ्नो पहिलो इलेक्ट्रिक मोटरसाइकलको नाम पनि लाइभवायर राखेको थियो । यही नामबाटै नयाँ ब्रान्डको नाम राखिएको छ । कम्पनीले सन् २०१९ मा सो मोटरसाइकल प्रदर्शन गरेको थियो । अब लाइभवायर ब्रान्ड अन्तर्गतको पहिलो माटरसाइकल भने आगामी जुलाइमा लन्च गर्ने तयारी भइरहेको बताइएको छ ।

हार्लेले इलेक्ट्रिक मोटरसाइकलका लागि अलग्गै ब्रान्ड ल्याउने घोषणा गत फेब्रुअरीमै गरेको थियो । युवा पुस्तालाई ध्यानमा राखेर र पर्यावरण संरक्षण गर्ने उद्देश्यका साथ कम्पनीले यो कदम चालेको बताइएको छ ।

हार्लेका सीईओ जोचेन जित्जले इलेक्ट्रिक भेइकल बजारमा नेतृत्व प्रदान गर्न र यसलाई परिभाषित गर्ने अवसरलाई स्वीकार गरेर लाइभवायरमा नयाँ प्रविधिको प्रयोग गर्ने समेत बताएका छन् ।

लाइभवायरको भर्चुअल हेड अफिस हुनेछ । यद्यपि यसको डिलरसिप भने हुनेछ । ्रग्राहकले डिजिटल तरिकाका साथै डिलरसिपको माध्यमबाट समेत लाइभवायरका मोटरसाइकल खरिद गर्न सक्ने छन् ।