२०६८ मा १ लाख ४६ हजार : २०७९ मा २ लाख २८ हजार

नेपाली बजारमा लोकप्रिय मानिने होन्डाको स्कुटर ‘डियो’ को मूल्य करिब ११ वर्ष पहिले २०६८ साल बैशाखमा १ लाख ४६ हजार रुपैयाँ थियो । करिव ११ वर्ष पश्चात यसको मूल्य २ लाख २८ हजार रुपैयाँ पुगेको छ । यो अवधिमा करिब ८२ हजार रुपैयाँ मूल्य बढेको छ ।

२०६८ सालमा डियोको एउटा भेरिएन्ट ‘न्यु डियो’ थियो र यसको मूल्य १ लाख ४५ हजार ९ सय रुपैयाँ थियो । हाल नेपाली बजारमा डियोको एलईडी स्ट्यान्डर्ड र डिलक्स गरी दुई भेरिएन्ट उपलब्ध छ । यसको मूल्य क्रमशः २ लाख १५ हजार ९ सय र २ लाख २७ हजार ९ सय रुपैयाँ छ ।

नेपाली बजारमा होन्डा डियो निकै नै लोकप्रिय स्कुटर हो । डियो डिलक्समा सीबीएस ब्रेकिङ सिष्टम र स्ट्याबिलिटी कन्ट्रोल, फुल्ली डिजिटल मिटर, मोबाइल चार्जिङ सकेट लगायतका आधुनिक विशेषता थपिएको छ । त्यसैगरी स्कुटरको पर्फमेन्स तथा माइलेजका ‘एचइटी’ इन्जिन, सिट ओपनिङ स्विचसँगै फोर इन वान लक, सर्भिस रिमाइन्डर इन्डिकेटर र गोल्ड रिमको विशेषता प्रदान गरिएको छ ।

स्कुटरमा एलईडी हेडलाइट जडान गरिएको छ । यसमा डिजिटल स्पिडोमिटर र ट्रिप मिटर छ । यसमा फ्रन्ट एन्ड रियर क्यारी हुक, लो–फ्यूल वार्निङ ल्याम्प, अल डिजिटल कन्सोल तथा मोबाइल चार्जिङजस्ता फिचर उपलब्ध छ ।

यसबाहेक स्कुटरको इन्जिन, लुक्स लगायत अन्य पक्षमा दुई स्कुटर बीचमा कुनै भिन्नता छैन । यसमा १०९.१९ सीसी सिंगल सिलिन्डर एयरकुल्ड इञ्जिन छ, जसले ८ बीएचपी पावर तथा ८.९१ एनएम टर्क जेनेरेट गर्छ । यसको इञ्जिनमा भी–मेटिक सीभीटी गियरबक्स जडान गरिएको छ भने यो स्कुटर भारतीय प्रदूषण मापदन्ड बीएस फोरमा आधारित रहेको छ ।