एकैपटक ८०.७ प्रतिशत बढ्यो बीवाईडीको आम्दानी, सन् २०२३ मा आम्दानीले ग-यो रेकर्ड ब्रेक

चिनियाँ अटो निर्माता कम्पनी बीवाईडीले गत वर्ष भन्दा २०२३ मा ८०.७ प्रतिशत बढी अर्थात ३० बिलियन युआन (४.१६ बिलियन अमेरिकी डलर) खुद आम्दानी गरेर रेकर्ड कायम गरेको छ ।

इलेक्ट्रिक सवारी साधनको बजारमा तीव्र प्रतिस्पर्धा भइरहेको समयमा बीवाईडीले भने आक्रामक रुपमा बजार विस्तार गरिरहेको र नाफा समेत बढाउदै गएको छ ।

बीवाईडीले यो भन्दा पहिले टेस्लालाई समेत उछिनेर इलेक्ट्रिक कार बिक्री गर्ने सबैभन्दा ठूलो कम्पनी बन्न सफल भएको थियो ।

सन् २०२२ को अप्रिलमा ग्यासोलिन कारको उत्पादन बन्द गर्ने र हाइब्रिड तथा इलेक्ट्रिक कार मात्र उत्पादन गर्ने घोषणा बीवाईडीले गरेको थियो ।

बीवाईडीले पछिल्लो समयमा अन्य देशमा समेत ईभी फ्याक्ट्री निर्माण कार्य गरिरहेको छ । यही वर्षको शुरुमा हंगेरीमा समेत ईभी उत्पादन गर्ने घोषणा गरेर युरोपमा प्यासेन्जर कार उत्पादन गर्ने पहिलो चाइनिज कम्पनी बन्ने घोषणा बीवाईडीले गरेको थियो ।

हालै मात्र बीवाईडी ग्रुपले ७० लाख कार उत्पादन गरेर नयाँ माइलस्टोन हासिल गरेको सार्वजनिक भएको थियो ।

ईभी बाहेक ब्लेड ब्याट्रीका लागि समेत बीवाईडी लोकप्रिय छ । सो ब्याट्री टेस्ला, बीएमडब्ल्यु, मर्सिडिज र आउडी जस्ता ग्लोबल अटो मेकरलाई समेत बीवाईडीले उपलब्ध गराइरहेको छ ।