उत्कृष्ट लक्जरी फिचरले भरिपूर्ण ७०० किमी रेन्ज दिने औडीको इलेक्ट्रिक कार आउँदै

लक्जरी कार निर्माता कम्पनी औडीले कन्सेप्ट इलेक्ट्रिक कार औडी ए६ एभेन्ट ई–ट्रोन सार्वजनिक गरेको छ । सो इलेक्ट्रिक कारको उत्पादन पछि कम्पनी लक्जरी इलेक्ट्रिक कारको सेग्मेन्टमा प्रवेश गर्नेछ ।

कम्पनीले यो भन्दा पहिले औडी ए६ ई–ट्रोन कन्सेप्ट सार्वजनिक गरेको थियो, जसले फुल चार्जमा ६४३ किलोमिटरको ड्राइभिङ रेन्ज दिने दाबी गरेको थियो । अब भने औडी ए६ एभेन्ट ई–ट्रोन सार्वजनिक गरिएको हो ।

नयाँ औडी ए६ एभेन्ट ई–ट्रोनमा अग्लो छत र लामो फ्रन्ट ओभरह्याङ दिएको छ, जसमा लामो बडी प्रयोग गरिएको छ । साथै यसमा सिंगल फ्रेम ग्रिल दिइएको छ, जसमा फ्ल्याट हेडलाइट बेजेल देख्न सकिन्छ ।

कारमा कम्पनीले ब्रेक र पावरट्रेनलाई चिसो पार्न एयर इन्टेक पनि दिएको छ । नयाँ औडी ए६ एभेन्ट ई–ट्रोनको फ्रन्ट कम्पनीका अन्य ई–ट्रोन मोडलहरू जस्तै राखिएको छ । यसमा सिग्नेचर हेक्सागोनल फ्रन्ट ग्रिलसहितको बडी प्लेट दिइएको छ ।

यसका साथै कारको फ्रन्ट ग्रिलको दुबै छेउमा म्याट्रिक्स एलईडी हेडलाइटहरू जडान गरिएको छ भने रियरमा एलईडी टेललाइटहरू जडान गरिएको छ । सो कारमा १०० केडब्ल्युएचको ब्याट्री प्याक प्रयोग गरिएको छ ।

सो इलेक्ट्रिक कारले एकै पटक चार्जमा लगभग ७०० किलोमिटरको ड्राइभिङ रेन्ज प्रदान गर्ने दावी गरिएको छ । यसलाई २७० केडब्ल्यु पावर स्रोतबाट चार्ज गर्न सकिन्छ, जसले १० मिनेटको चार्जमा ३०० किलोमिटरको रेन्ज दिने दाबी गरिएको छ ।

रिपोर्टका अनुसार सो इलेक्ट्रिक कार युरोपियन युनियन र अमेरिकामा मात्रै लन्च गरिने छ ।