भारतमा अक्टोबर १ देखी सबै कारमा ६ वटा एयरब्याग अनिबार्य, मूल्य थप महंगिने

भारत सरकारले सबै कारमा ६ वटा एयरब्याग अनिबार्य गर्ने भएको छ । यो नयाँ नियम यसै वर्षको अक्टोबर महिनादेखी लागु हुनसक्ने देखिएको छ । नयाँ नियम लागु भएपछि भारतीय अटो उत्पादकहरुले आफ्ना सबै मोडलका कारमा ६ वटा एयरब्याग अनिबार्य गर्नुपर्ने छ ।

यसले एउटै कारको मूल्य ५० हजार भारुसम्म बृद्धि हुनसक्ने जनाइएको छ । भारतमा अहिले अधिकांश अटो उत्पादकले १० लाखभन्दा माथीका कारमा मात्र ६ वटा एयरब्याग उपलब्ध गराउँदै आएका छन् ।

नयाँ नियमअनुसार ८ जनासम्म बस्न मिल्ने गाडीको अगाडी २ वटा र दायाँ बायाँ साइडमा २/२ वटाका दरले कर्टेन एयरब्याग अनिबार्य राख्नुपर्नेछ । यसरी राखिने एयसब्यागको गुणस्तर समेत सरकारले तोकेको मापदन्ड अनुसार हुनुपर्ने जनाइएको छ ।

विश्वको चौथो ठूलो अटो बजार भारतमा पछिल्लो समय प्राय सबैजसो अन्तारिष्ट्र्रय ब्रान्डले सवारी साधन उत्पादन गर्दै आइरहेका छन् । अटो उत्पादनको हबका रुपमा विकसित हुँदै गएको बजारलाई मध्येनजर गर्दै उसले चरणबद्ध रुपमा सेफ्टि फिचर्सलाई अपडेट गर्दै लगिरहेको छ ।

सोही क्रममा सन् २०१९ मा सबै कारको ड्राइभर सिटमा एयरव्याग अनिबार्य गरेको उसले यसै बर्षको जनवरी महिनामा प्यासेन्जर एयरव्यागलाई अनिबार्य गराएको थियो ।

अब लागु हुने नयाँ नियमले भारतसहित नेपाली बजारमा समेत मूल्य बढाउने देखिएको छ । नयाँ नियम लागु भएर गाडी उत्पादन हुन थालेपछि एयर व्याग अनिबार्य गरिएकै कारण नेपालमा यी कारको मूल्य २ लाखभन्दा बढीले बृद्धि हुने आँकलन गर्न सकिन्छ ।