११ महिनामा बीवाईडीले बेच्यो ३७ लाख ५७ हजार बढी गाडी, नोभेम्बरमै बिक्री भए ५ लाख बढी एनईभी

चाइनिज ईभी ब्रान्ड बीवाईडीले नोभेम्बर महिनामा ५ लाख ६ हजार ८ सय भन्दा बढी गाडी अर्थात न्यु इनर्जी भेइकल (एनईभी) बिक्री गरेको छ । हालै प्रकाशित तथ्यांक अनुसार बीवाईडीले दोस्रो पटक एकै महिनामा ५ लाख भन्दा बढी एनईभी बिक्री गरेको हो भने मासिक रुपमा रेकर्ड बिक्री गरेको यो छैटौं पटक हो ।

गत वर्षको यही अवधिको तुलनामा यो ६७.८७ प्रतिशत बढी हो भने गत अक्टोबर महिनाको तुलनामा ०.८३ प्रतिशत बढी हो । गत वर्षको नोभेम्बरमा कम्पनीले करिव ३ लाख २ हजार एनईभी बिक्री गरेको थियो ।

बीवाईडीले यो अवधिमा बिक्री गरेको प्यासेन्जर र कमर्सियल दुवै गाडीको तथ्यांक यसमा समेटिएको छ । ती मध्ये प्यासेन्जर एनईभी ५ लाख ४ हजार र कमर्सियल भेइकल करिव २ हजार ८ सय युनिट बिक्री भएका हुन् ।

यस अनुसार यो वर्षको जनवरी देखि नोभेम्बर सम्म ११ महिनाको अवधिमा बीवाईडीका ३७ लाख ५७ हजार ३३६ युनिट एनईभी बिक्री भएका छन् । गत वर्षको यही अवधिको तुलनामा यो ४०.०२ प्रतिशत बढी हो । यस मध्ये प्यासेन्जर एनईभी ३७ लाख ४० हजार ९३० युनिट बिक्री भएका छन्, जुन गत वर्षको तुलनामा ३९.९७ प्रतिशत बढी हो । अन्तर्राष्ट्रिय बजारमा यही अवधिमा ३ लाख ६० हजार ५० युनिट गाडी बिक्री भएका छन्, जुन गत वर्षको यही अवधिको तुलनामा ७४.२१ प्रतिशत बढी हो ।

कम्पनीले सन् २०२३ मा संसारभर ३० लाख २४ हजार ४१७ गाडी बिक्री गर्न सफल भएको थियो । यो संख्या सन् २०२२ को तुलनामा ६१.८ प्रतिशत बढी थियो । यो वर्ष भने कम्पनीले अझै बढी गाडी बिक्री गर्ने लक्षण देखिएको छ ।

बीवाईडीले सन् २०२४ भरीमा ३६ लाख गाडी बिक्री गर्ने लक्ष्य लिएको थियो । यस अनुसार यो लक्ष्य स्वाभाविक रुपमा हासिल भइसकेको छ । बीवाईडीले आन्तरिक रुपमा यो लक्ष्य बढाएर ४० लाख पु¥याउने लक्ष्य लिएको समाचार समेत सार्वजनिक भएका छन् । यद्यपि बीवाईडीले सो लक्ष्य लिएको वारेमा भने केही बताएको छैन ।

यसरी प्रकाशित सेल्स डाटा अन्तर्गत बीवाईडीले बिक्री गरेका न्यु इनर्जी भेइकल (एनईभी) को बिक्री तथ्यांक पर्छन् । यस अन्तर्गत ब्याट्री इलेक्ट्रिक र प्लग इन हाइब्रिड भेइकल पर्छन् । फ्युल सेल इलेक्ट्रिक अर्थात हाइब्रिड भेइकल समेत यसमा परे पनि बीवाईडीले यी भेइकल उत्पादन नगर्ने भएकाले सो डाटामा समावेश छैन ।

पेट्रोलियम पदार्थबाट चल्ने गाडी अर्थात आईसीई कारको उत्पादन भने बीवाईडीले सन् २०२२ को अप्रिल देखि नै बिक्री गर्न बन्द गरेको हो ।