३ लाख ९८ हजार डाउन पेमेन्टमै इलेक्ट्रिक सोलार कार, मासिक किस्ता २५ हजार

डेरी ईएम७ इलेक्ट्रिक र सोलार दुवैबाट चलाउन सकिने हाइब्रिड कार हो । नेपाली बजारमा यसको आधिकारिक वितरकको रुपमा अटोहोस्ट प्रालिले कार बिक्री गरिरहेको छ ।

डेरी ईएम७ को मूल्य हाल १९ लाख ९० हजार रुपैयाँ तोकिएको छ । विद्युतीय गाडीलाई ८० प्रतिशत सम्म बैंकहरुले फाइनान्स गर्न सक्ने सुविधा उपलब्ध भएकाले ग्राहकले शुरुमा ३ लाख ९८ हजार रुपैयाँ मात्र डाउन पेमेन्ट गरेर यो कार लिन सक्छन् । हाल ५० हजार रुपैयाँ तिरेर यो कार बुकिङ गर्न सकिन्छ ।

७ वर्ष सम्मको फाइनान्स सुविधा उपलब्ध हुने भएकाले डेरी ईएम७ कारलाई प्रतिमहिना २५ हजार ६१४ रुपैयाँ किस्ता बुझाउनु पर्छ ।

५ जना यात्रु बस्न मिल्ने यो कारको माथिल्लो भागमा ठूलो सोलार रुफ छ । यसमा भएको १७ किलोवाट आवरको ब्याट्री र १५ किलोवाटको मोटरको साथमा आवश्यकता अनुसार सोलारमार्फत समेत चार्ज हुन्छ ।

फुल चार्जका लागि साढे ५ घण्टा जति समय लाग्ने यो गाडीको टप स्पिड ६० किलोमिटर प्रतिघण्टा छ । १७० एमएम ग्राउन्ड क्लियरेन्स भएको डेरी ईएम७ मा १७० लिटरको बुट स्पेस छ ।

सिंगल चार्जमा डेरी ईएम७ ले २६० किलोमिटरको रेन्ज दिन्छ । यद्यपि सोलार समेत भएकाले यसको माइलेज अझै बढ्न सक्छ । गाडीमा पावर विन्डो, हिल असिस्ट, रियर भ्यु क्यामेरा, सेन्ट्रल लक, टचस्क्रिन इन्फोटेनमेन्ट सिस्टम, अलोय ह्विल आदि फिचर उपलब्ध छन् ।

हेनान डेरी चीनको प्रसिद्ध इलेक्ट्रिक गाडी निर्माता कम्पनी हो । विश्वका विभिन्न देशमा यो कम्पनीका इलेक्ट्रिक तथा सोलार गाडी प्रयोगमा आएका छन् ।