एलआरआर मोटर्सबाट एकैदिन १६ जनालाई सेरेस–३ हस्तान्तरण

काठमाडौं– सेरेस ईभीको पानीपोखरीस्थित शोरुम एलआरआर मोटर्सले बुधबार एकैदिन १६ जना ग्राहकलाई नयाँ इलेक्ट्रिक एसयूभी सेरेस–३ हस्तान्तरण गरेको छ । सेरेसको पहिलो गाडी समेत सोही शोरुमबाट हस्तान्तरण गरिएको कम्पनीका प्रबन्ध निर्देशक जीवनजंग शाहीले बताए ।

उपत्यकाका लागि सेरेसको पहिलो डिलरका रुपमा आफूले शोरुम सञ्चालन गरेको शाहीको भनाई छ । उनका अनुसार शोरुममा सेरेस ब्रान्डबारे जानकारी लिन ग्राहकहरु बाक्लै संख्यामा आउने गरेका छन् । ‘हामीले सेरेस–३ र मिनी ईभीको बुकिङ राम्रै संख्यामा लिएका छौ । उनीहरुलाई जतिसक्दो चाँडो गाडी हस्तान्तरण गर्न हामी र आयतकर्ता कम्पनी एमएडब्लु बृद्धि आतुर छौ । बुकिङ लिएका ग्राहकले विस्तारै आफ्नो गाडी हात पार्नुहुनेछ’ उनले नेपाल अटोसंग भने ।

नयाँ ब्रान्डका रुपमा भित्रिएको सेरेसले पछिल्लो समय ईभी पारखीलाई आकर्षित गरिरहेको छ । हालै सम्पन्न नाडा अटो शोमा औपचारिक लन्च भएको यसको सेरेस–३ र मिनी ईभी खरिद गर्न भन्दै ३ सय बढि ग्राहकले बुकिङ लिएका छन् । तिहार अघि ५० जनालाई सेरेस–३ हस्तान्तरण गरिने कम्पनीको भनाई छ ।

सेरेस–३ र मिनी ईभी गरी दुईवटा मोडलमा नेपाल आएको यसको सेरेस ३ कम्फर्ट र प्रिमियम गरी दुई भेरियन्ट मा उपलब्ध छ भने मिनी ईभी तीनवटा भेरिएन्टमा बिक्री हुँदै आएको छ ।

सेरेस–३ कम्फर्टको मुल्य ४९ लाख ९९ हजार र प्रिमियमको ५२ लाख ९९ हजार निर्धारण गरिएको छ भने मिनी ईभीको लो ट्रिमलाई १३ लाख ९९ हजार, मिड ट्रिमको १६ लाख ४९ हजार र टप ट्रिमको १७ लाख ९९ हजार रुपैयाँ तोकिएको छ ।