टीभीएसले ल्यायो १५ भ्वाइस कमान्ड पहिचान गर्न सक्ने पावरफुल स्कुटर

टीभीएसले भारतीय बजारमा टीभीएस एनटर्क १२५ रेस एक्सपी स्कुटर लन्च गरेको छ । ८३ हजार २७५ भारु मूल्य तोकिएको सो स्कुटरमा नयाँ ट्राई–कलर पेन्ट स्किम उपलब्ध छ । स्कुटरमा स्पोर्टीनेस बढाउनका लागि रेस प्रेरित बडी डिकल उपलब्ध गराइएको छ भने स्पोर्टी रेड ह्विलले स्कुटरको लुकलाई अझै सानदार बनाएको छ ।

टीभीएस एनटर्क १२५ रेस एक्सपी स्कुटरमा अपडेट गरिएको स्मार्ट एक्सोकनेक्ट कनेक्टिभिटी फिचर र डुअल राइडिङ मोड छ । स्मार्ट एक्सोकनेक्ट पछिल्लो समयमा टीभीएसका धेरै बाइक र स्कुटरमा उपलब्ध एक विशेष ब्लुटुथ इनेबल्ड टेक्नोलोजी हो, जसलाई एक विशेष टीभीएस कनेक्ट मोबाइल एपसँग जोड्न सकिन्छ । एन्ड्रोइड र एप्पल दुवै प्लेटफर्ममा यो उपलब्ध छ ।

नयाँ स्कुटरमा भएको टीभीएस स्मार्ट एक्सोकनेक्ट फिचरमा पहिलो पटक आफ्नै भ्वाइस असिस्ट फिचर छ । यसमा मोड चेन्ज, नेभिगेसन, कन्सोल ब्राइटनेस एड्जस्टमेन्ट र डु नट डिस्टर्ब जस्ता कनेक्टिभिटी फङ्सन उपलब्ध छन् । यो स्कुटरलाई १५ विभिन्न भ्वाइस कमान्ड दिन सकिन्छ, जसको सहयोगले राइडरले बोलेर मात्रै यसमा भएका फिचरलाई चलाउन र बन्द गर्न सक्छन् ।

टीभीएस एनटर्क १२५ रेस एक्सपीमा रेस ट्युन्ड फ्युल इन्जेक्सन (आरटी–एफआई) टेक्नोलोजीका साथ १२५ सीसी सिंगल सिलिन्डर इन्जिन छ, जसले १०.२ पीएस पावर र १०.८ एनएम टर्क जेनेरेट गर्छ । यो ९८ किमी प्रतिघण्टाको टप स्पिडमा कुद्न सक्छ । यसलाई सेगमेन्टकै सबैभन्दा पावरफुल स्कुटर भएको दावी गरिएको छ ।

यो स्कुटरलाई रेस मोड र ड्राइभिङ मोड गरी दुई मोडमा चलाउन सकिन्छ । टीभीएसले यो स्कुटर आधुनिक प्रविधि मन पराउने युवा पुस्ताका लागि उपयुक्त हुने बताएको छ ।