माघ महिनामा नेपाल भित्रिए १ हजार ५२ विद्युतीय कार

काठमाडौं – चालु आर्थिक वर्षको साउन देखि माघ महिना सम्म ७ महिनाको अवधिमा नेपालमा ६ हजार १५९ विद्युतीय कार, जिप र भ्यान भित्रिएका छन् ।

भन्सार विभागले हालै प्रकाशित गरेको तथ्यांक अनुसार उक्त परिमाणमा आयात भएको विद्युतीय गाडीका लागि नेपालबाट १५ अर्ब ४ करोड ९ लाख ४६ हजार रुपैयाँ बाहिरिएको छ। सोमार्फत सरकारले ६ अर्ब ६२ करोड ८० लाख ३० हजार रुपैयाँ राजस्व संकलन गरेको छ। विद्युतीय गाडी आयातको उक्त तथ्यांक गत आर्थिक वर्षको सोही अवधिको तुलनामा ३ गुणा बढी हो। गत आर्थिक वर्षको साउनदेखि माघसम्म २ हजार ९ वटा विद्युतीय गाडी आयात भएका थिए।

गत पुस सम्म ५ हजार १०७ विद्युतीय गाडी भित्रिएकोमा माघ सम्म ६ हजार १५९ विद्युतीय गाडी भित्रिएका हुन् । यस अनुसार एक महिनाको अवधिमा १ हजार ५२ विद्युतीय कार, जिप र भ्यान भित्रिएका छन् ।