३८ मिनेटमै १० हजार अर्डर, चीनमा जीकर ८एक्सको धमाका

विद्युतीय सवारी साधन निर्माता कम्पनी जीकरले आफ्नो नयाँ प्लग–इन हाइब्रिड एसयूभी जीकर ८एक्स लन्च गरेको छ । सो गाडी लन्च भएको केवल ३८ मिनेटभित्रै १० हजारभन्दा बढी अर्डर प्राप्त गरेको कम्पनीले जनाएको छ।

सो गाडी पेट्रोल र इलेक्ट्रिक दुवैबाट सञ्चालन हुने प्लग इन हाइब्रिड प्रविधिमा आधारित छ। यसको लोकप्रियता यति तीव्र देखिएको छ कि ४८ घण्टाभित्रै अर्डर संख्या ३० हजार नाघेको छ । यद्यपि, सो गाडी अन्य बजार कहिले प्रवेश गर्ने भन्ने विषयमा हालसम्म कुनै आधिकारिक जानकारी सार्वजनिक गरिएको छैन ।

जीकर ८एक्समा २.० लिटर टर्बो पेट्रोल इन्जिनसँगै शक्तिशाली विद्युतीय मोटर जडान गरिएको छ। टप याओइङ भेरिएन्टले १३८१ हर्सपावर उत्पादन गर्ने क्षमता राख्छ र मात्र २.९६ सेकेन्डमा ० देखि १०० किलोमिटर प्रतिघण्टाको गति लिन सक्षम रहेको कम्पनीको दाबी छ।

सो गाडी ५५.१ किलोवाट आवर र ७० किलोवाट आवर घण्टा ब्याट्री विकल्पमा उपलब्ध छ । सो गाडीले पेट्रोल र ब्याट्री दुवै प्रयोग गर्दा एकपटक चार्जमा अधिकतम १४१६ किलोमिटरसम्म यात्रा गर्न सक्छ। फास्ट चार्जिङ प्रविधिका कारण ठुलो ब्याट्री समेत केवल ९ मिनेटमा २० प्रतिशतदेखि ८० प्रतिशतसम्म चार्ज गर्न सकिन्छ।

सो एसयूभीको इन्टेरियर निकै हाई टेक छ। ५ सिट र ६ सिट दुवै विकल्पमा उपलब्ध सो गाडीमा ४४ इन्चको हेड–अप डिस्प्ले र पछाडि यात्रुका लागि अलग ओएलईडी स्क्रिन जडान गरिएको छ। यसमा २९ स्पिकरसहितको साउन्ड सिस्टम राखिएको छ। साथै, स्मार्ट ड्राइभिङका लागि ४३ वटा सेन्सर र ५ वटा लाइडार प्रविधि समावेश गरिएको छ ।

उच्च प्रविधि, शक्तिशाली प्रदर्शन र आकर्षक डिजाइनका कारण जीकर ८एक्स ले चिनियाँ बजारमा छोटो समयमै ठुलो लोकप्रियता हासिल गरेको छ, जसले भविष्यमा विश्व बजारमा पनि यस गाडीको सम्भावना बलियो रहेको संकेत गर्छ।