अमेरिकामा एकैपटक १०० भन्दा बढी गाडी दुर्घटनामा, यस्तो छ कारण

अमेरिकाको मिशिगन राज्यमा आएको भीषण हिम आँधीका कारण एउटा राजमार्गमा १०० भन्दा बढी सवारीसाधन एकआपसमा ठोक्किएको वा सडकबाट चिप्लिएर दुर्घटनामा परेका छन् ।

सोमबार ग्रान्ड -यापिड्स सहरको दक्षिण–पश्चिमतर्फ रहेको इन्टरस्टेट १९६ राजमार्गमा भएको उक्त दुर्घटनापछि दुवै दिशाको सडक पूर्ण रूपमा बन्द गरिएको मिशिगन स्टेट प्रहरीले जनाएको छ ।

प्रहरीका अनुसार ३० भन्दा बढी ट्रेलर ट्रकसहित कयौँ गाडी दुर्घटनामा परेका छन् । यसमा धेरै मानिस घाइते भए पनि हालसम्म कसैको मृत्यु भएको पुष्टि नभएको प्रहरीले बताएको छ ।

सामाजिक सञ्जाल र स्थानीय सञ्चारमाध्यममा सार्वजनिक तस्बिर तथा भिडियोमा हिउँले ढाकिएको सडकमा ट्रक र कारहरू लामो दूरीसम्म एकआपसमा ठोक्किएको देखिन्छ ।

यो दुर्घटना अमेरिकाभर फैलिँदै गएको कडा हिउँदे आँधीको पछिल्लो प्रभाव हो । अमेरिकी राष्ट्रिय मौसम सेवाले मिनेसोटादेखि विस्कोन्सिन, इन्डियाना, ओहायो, पेन्सिलभेनिया हुँदै न्यूयोर्कसम्म अत्यधिक चिसो र हिउँ आँधीको चेतावनी जारी गरेको छ ।