५ मिनेटमै इलेक्ट्रिक स्कुटर शतप्रतिशत चार्ज हुने

ओला इलेक्ट्रिकले एक्स्ट्रिम फास्ट चार्जिङ प्रविधिको ब्याट्री निर्माण गर्न इजरायली कम्पनी स्टोरडटसँग साझेदारी गरेको छ । यो साझेदारीबाट ओला इलेक्ट्रिकले आफ्नो ब्याट्रीमा स्टोरडटको एक्सएफसी प्रविधि प्रयोग गर्न सक्नेछ । एक्सएफसी प्रविधिबाट ५ मिनेटमा ० देखि १०० प्रतिशतसम्म ब्याट्री चार्ज गर्ने क्षमता छ ।

उक्त साझेदारीसँगै ओलासँग यो विशेष प्रविधिको सहयोगमा द्रुत चार्ज हुने ब्याट्री बनाउने विशेष अधिकार हुनेछ । ओला इलेक्ट्रिकले एक प्रेस विज्ञप्ति मार्फत यो जानकारी दिएको हो । तर, कम्पनीले इजरायली कम्पनीमा कति लगानी गरेको भन्ने खुलाएको छैन ।

ओलाले इलेक्ट्रिक स्कुटर समयमै आपूर्तिका लागि गिगाफ्याक्ट्री स्थापना गर्ने योजना बनाएको छ । एक ट्वीटमा ओलाका सीईओ भाविश अग्रवालले भने, “हामी यस क्षेत्रमा काम गर्ने विश्वव्यापी कम्पनीहरूसँग साझेदारी गर्दैछौं । स्टोरडटसँगको साझेदारीले ग्राहकलाई राम्रो रेन्ज र चार्जिङ स्पिड परफर्मेन्स उपलब्ध गर्नेछ । दुवै कम्पनी प्रदूषण कम गर्न र वातावरण संरक्षण गर्न पूर्ण रूपमा प्रतिबद्ध छन् ।’

केही दिन अघि ओला इलेक्ट्रिकले आफ्नो एस१ प्रो इलेक्ट्रिक स्कुटरलाई मुभएसओ २.० सँग अप्रिलमा अपडेट गर्ने बताएको थियो । यस अपडेटमा यस स्कुटरमा केही नयाँ फिचर थपिने छन् । सो स्कुटरमा क्रुज कन्ट्रोल, ब्लुटुथ कनेक्टिभिटी र नेभिगेसन जस्ता फिचर समावेश गर्ने सम्भावना रहेको छ । रिपोर्टका अनुसार कम्पनीले अपडेट गरेको ओला इलेक्ट्रिक स्कुटरको मूल्य पनि बढाउने सम्भावना रहेको छ ।