१२ वर्षमा १० लाख युनिट बिक्री भयो मारुती सुजुकी इको, यस्तो छ विशेषता

भारतीय बजारमा सबैभन्दा बढी बिक्री हुने फेमिली एमपीभीको रुपमा परिचित मारुती सुजुकी इको १० लाख युनिट भन्दा बढी बिक्री भएको छ । कम्पनीले हालै सो घोषणा गरेको छ ।

इकोको सहयोगमा कम्पनीले एमपीभी बजारमा ९४ प्रतिशत हिस्सा ओगट्न सफल भएको छ । यसमा भएको इन्जिन, कम्फर्ट र सबै प्रकारको आवश्यकता पुरा गर्नका लागि उपयोगी भएकैले यसको लोकप्रियता बढेको कम्पनीको भनाइ छ ।

कम्पनीले यसलाई प्यासेन्जर, कार्गो र एम्बुलेन्स मोडलमा समेत उपलब्ध गराएको छ । नयाँ मोडल पहिले भन्दा थप फ्युल इफिसियन्ट, रिफ्रेस इन्टेरियर र एड्भान्स्ड फिचरका साथ उपलब्ध छ ।

अगाडीको चक्कामा डिस्क र पछाडी ड्रम ब्रेक दिइएको यो भ्यानको कुल तौल ९४० किलोग्राम रहेको छ । ४० लिटर इन्धन अट्ने ट्यांक उपलब्ध भएको इकोमा ड्राइभर एयरब्याग, एबिएस, इबिडी, रिभर्स पार्किङ सेन्सर, सिट बेल्ट रिमाइन्डर जस्ता सेफ्टि फिचर्स दिइएको छ ।

नेपाली बजारमा समेत ११९६ सीसी इन्जिनयुक्त सुजुकी इको र इको कार्गो भ्यान उपलब्ध छ । सो इन्जिनले ७३ पीएस पावर र ९८ एनएम टर्क जेनेरेट गर्छ । यी दुई गाडीको मूल्य क्रमशः २८ लाख ४९ हजार र १६ लाख ९१ हजार रुपैयाँ छ ।