जोनसेनका मोटरसाइकल नाडा अटो शो पहिले लन्च हुने, अटो शोमा अवलोकन गर्न पाइने

काठमाडौं – नेपाली बजारमा जोनसेनका मोटरसाइकल उपलब्ध हुने भएका छन् । नेपालका लागि आधिकारिक वितरक स्यामुकापु ट्रेडिङ प्रालिले यी मोटरसाइकल नेपाल भित्र्याएको हो ।

नाडा अटो शो २०२४ प्रारम्भ हुनु भन्दा एक दिन अघि सो मोटरसाइकल लन्च गरिने कम्पनी स्रोतको भनाइ छ । अटो शोमा समेत सो मोटरसाइकल अवलोकन गर्न सकिने छ ।

ज्योति समूह अन्तर्गतको एनजीएम प्रालिले पहिले हिरो मोटरसाइकल र स्कुटर बिक्री–वितरण गर्ने गरेकोमा हाल सो ब्रान्ड सीजी मोटर्सले बिक्री–वितरण गरिरहेको छ । ज्योति समूह अन्तर्गतकै स्यामुकापु ट्रेडिङले अब जोनसेन ब्रान्ड बिक्री–वितरण गर्न थालेको हो । स्यामुकापुमा इलेक्ट्रिक वान स्कुटर समेत केही दिन यता बिक्री–वितरण गरिरहेको छ ।

हाल पहिलो चरणमा २५० सीसीको एड्भेन्चर मोटरसाइकल नेपाली बजारमा उपलब्ध हुनेछ । यसको फिचर र मूल्य भने कम्पनीले सार्वजनिक गरेको छैन ।

त्यसैगरी नेपालमै यो ब्रान्डका उत्पादन एसेम्बल गर्ने योजना समेत रहेको बताइएको छ । चीनका विभिन्न ६ सहरमा उत्पादन हुने जोनसेन ब्रान्डका मोटरसाइकल र स्कुटर नेपाली बजारमा समेत रुचाइने कम्पनीको अनुमान छ ।