जोङसेन बाइकले शुरु गर्यो पूर्बका सहरमा टेष्ट राइड कार्यक्रम

नेपाली बजारमा हालसालै भित्रिएको टु ह्विलर ब्रान्ड जोङसेनले पूर्बका बिभिन्न शहरहरुमा टेष्ट राइड कार्यक्रमको आयोजना गरेको छ । धरानमा हिजोदेखी शुरु भएको यो कार्यक्रम दमक र बिर्तामोडमा समेत अयोजना गरिने आधिकारिक बितरक रिजोन मोटर्सका प्रबन्ध निर्देशक खगेन्द्र बस्नेतले बताए । उनका अनुसार धरानको कार्यक्रमा आज सकिएपछि दमकमा १३ र १४ गते तथा बिर्तामोडमा १६ र १७ गते आयोजना गर्न लागिएको हो । टेष्ट राइड सम्पन्न गरेपछि यी स्थानमा शोरुम समेत बिस्तार गर्ने आफूहरुको योजना रहेको उनले बताए ।

जोङसेनको हाल काठमाडौं र सुर्खेतमा शोरुम स्थापना भैसकेको छ । निकट भबिष्यमै देशका अन्य स्थानहरुमा समेत शोरुम बिस्तार गर्ने योजना अनुसार पहिलो चरणमा देशब्यापी टेस्ट राइड कार्यक्रम आयोजना गरिएको हो । पहिलो चरणमा २ वटा मोटरसाइकल र एउटा स्कुटर भित्राएर औपचारिक बिक्री शुरु गरेको कम्पनीले निकट भबिष्यमा थप मोडलका मोटरसाइकल र स्कुटर समेत अयात गर्ने योजना बनाएको छ । बजारमा हाल यसको आरएक्स–३ र जेड–वान मोटरसाइकल तथा जेडटी६ स्कुटर उपलब्ध रहँदै आएको छ । यी मोटरसाइकल र स्कुटरको मूल्य क्रमशः ६ लाख १९ हजार, २ लाख ७९ हजार र २ लाख ३९ हजार रुपैयाँ तोकिएको छ ।

मोटरसाइकल र स्कुटरको बिक्री संगसंगै मर्मत सम्भारका लागि आवश्यक सर्भिस सेन्टर र स्पेयर पार्टसको समेत उचित प्रबन्ध मिलाइएको कम्पनीले दाबी गरेको छ । साथै टु ह्विलरमा नेपालमै पहिलो पटक जोङसेन बाइकमा आफूहरुले ७ वर्ष सम्मको इन्जिन वारेन्टी शुरु गरेको बस्नेतको भनाई छ ।