विश्वकै एड्भान्स्ड भेइकल फ्यासिलिटीबाट उत्पादन भएको जिकर ००१ ईभी सार्वजनिक ग-यो गिलीले

चीनको प्रसिद्ध अटोमोबाइल निर्माता कम्पनी गिली (जिली) को नयाँ फुल–इलेक्ट्रिक प्रिमियम ब्रान्ड जिकरले पहिलो इलेक्ट्रिक कार जिकर ००१ सार्वजनिक गरेको छ । जिकर ब्रान्डको नयाँ इन्टेलिजेन्ट फ्याक्ट्री रहेको स्थान चीनको निङबोमा सो गाडी सार्वजनिक गरिएको हो । यसको डेलिभरी भने आगामी अक्टोबर २३ देखि शुरु हुनेछ ।

निङबोमा रहेको नयाँ जिकर इन्टेलिजेन्ट फ्याक्ट्री विश्वकै सबैभन्दा एड्भान्स्ड भेइकल फ्यासिलिटी मध्ये एक हो । थोरै मात्र जनशक्ति कार्यरत उक्त फ्याक्ट्रीमा ३ सय भन्दा बढी रोबोटसहितको फुल्ली अटोमेटेड वेल्डिङ सेक्सन रहेको छ ।

कार उत्पादन प्रक्रियाका लागि कुनै अनुगमनको आवश्यकतै पर्दैन, किनभने वेल्डिङ प्रोडक्सन लाइनमा ग्लु एप्लिकेसन भिजुअल गाइडेन्स, अनलाइन मेजरमेन्ट र अल्ट्रासोनिक सेल्फ–इन्स्पेन्सन जस्ता सबै मोनिटरिङ सिस्टम समावेश हुन्छ । यी सबै कार्यका लागि फाइभजी भन्दा पनि माथिल्लो प्रविधिको इन्टेलिजेन्ट इन्टरनेट सिस्टमले सहयोग गरिरहेको हुन्छ ।

जिकर ००१ प्रोडक्सन मोडल गिलीको सस्टेनेबल इलेक्ट्रिक आर्किटेक्चर (एसईए) प्लेटफर्ममा आधारित छ । यसले ५४४ पीएस पावर र ७६८ एनएम टर्क जेनेरेट गर्छ । यसमा भएको १०० किलोवाट आवरको जेड–ब्याट्रीले एनईडीसी मेथडमार्फत ७ सय किलोमिटर सम्मको रेन्ज दिन्छ । यद्यपि आगामी दिनमा यसको रेन्ज फरक हुन सक्ने बताइएको छ । त्यसैगरी यो ब्याट्री ३० मिनेटमै १० देखि ८० प्रतिशत सम्म चार्ज हुन्छ ।

गत अप्रिल महिनामा सार्वजनिक गरिएको जिकर ००१ भन्दा यसको क्षमता केही फरक छ । विभिन्न परीक्षण र नयाँ प्रविधिका कारण यो सबै सम्भव भएको कम्पनीले बताएको छ ।