१९ लाख ४९ हजार रुपैयाँ सम्म मूल्यका यात्री मोटरसाइकल उपलब्ध : अब सिरिज २

नेपाली ईभी पारखीलाई आकर्षित गरिरहेको यात्री मोटरसाइकलले अब सिरिज २ उपलब्ध गराउने बताएको छ । यात्री मोटरसाइकलको फेसबुक पेजमा यस सम्बन्धी एउटा पोस्ट गरिएको छ । यसका आधारमा अब यात्रीले केही थप मोडल समेत उपलब्ध गराउने अनुमान गर्न सकिन्छ ।

नेपालमै डिजाइन गरिएको र उत्पादन समेत यही भएको यात्री मोटरसाइकल अहिले पनि चर्चाको शिखरमा रहँदै आएको छ । यात्रीले नेपालमा प्रोजेक्ट जिरो र प्रोजेक्ट वान गरी कुल २ वटा मोडलका इलेक्ट्रिक मोटरसाइकललाई बजारमा ल्याइसकेको छ ।

मूूल्य सुन्दा आम नेपाली उपभोक्ताको पहँुचभन्दा निकै टाढा रहेपनि यी दुई उत्पादनलाई नेपाली कम्पनीको सर्वोत्कृष्ट स्टार्ट अपका रुपमा भने लिन सकिन्छ । यी मोटरसाइकलको मूल्य क्रमशः १९ लाख ४९ हजार र ५ लाख ६५ हजारदेखि ६ लाख १३ हजार ४ सय रुपैयाँसम्म निर्धारण गरिएको छ । जसमध्ये हामीले यहाँ चर्चा गर्न खोजेको मोटरसाइकल महंगो मूल्यको यात्री प्रोजेक्ट जिरो हो ।

यो मोटरसाइकलको डिजाइन क्याफे रेसर स्टाइलबाट प्रेरित रहेको छ । जसलाई निर्माण गर्दा एकदमै स्तरिय सामाग्रीहरुको प्रयोग गरेको दावी गरिएको छ । यो मोटरसाइकलमा ८ किलोवाट आवरको लिथियम निकेल म्याग्नेसिस व्याट्री जडान गरेको छ । जसलाई एकपटक चार्ज गर्दा २३० किलोमिटर सम्मको रेन्ज पाउन सकिने दावी छ । ३.३ किलोवाटको अनवोर्ड चार्जरबाट २ घण्टमा बाइकको ब्याट्री फुल चार्ज गर्न सकिन्छ । पावर तथा पर्फमेन्सको मामिलामा समेत यो बाइक निकै मजुवत छ । यसको अधिकतम पावर ६४ एचपी र टर्क १२० एनएम रहेको छ । बाइकलाई १४० किलोमिटर प्रतिघन्टाको गतिमा हाँक्न सकिन्छ । यो बाइकको ग्राउन्ड क्लियरेन्स भने १७५ एमएममात्र रहेको छ ।

कार्वन फाइबर बडीसँगै स्टिल च्यासिसमा निर्माण गरिएको यो बाइकमा पूर्णतः एलईडी लाइट दिइएको छ । नेभिगेसन सहितको ७ इन्चको फुल एचडी डिस्प्ले कन्सोल उपलब्ध गराइएको यो बाइक फिचर्सको मामिलामा पूर्णतः लोडेड छ भन्दा फरक पर्दैन ।