यामाहाले ल्यायो विश्वकै पहिलो एयरब्याग सहितको स्कुटर

काठमाडौं– यामाहाले विश्वमै पहिलो पटक एयरब्याग सहितको स्कुटर सार्वजनिक गरेको छ । जापनिज टु–ह्विलर निर्माताले आफ्नो नयाँ २०२६ यामाहा ट्राइसिटी ३०० स्कुटरमा यात्रुको सुरक्षाका लागि एयरब्याग उपलब्ध गराएको हो ।

हालसम्म चार पांग्रे सवारीमा सुरक्षाका लागि एयरब्याग उपलब्ध हुँदै आएकोमा यामाहाले दुई पांग्रे सवारीमा पनि एयरब्याग सम्भव बनाएको हो । एयरब्याग स्कुटरको अगाडिको लेग–सिल्ड भएको ठाउँमा जडान गरिएको छ ।

यामाहाका अनुसार, सेन्सरले ठक्करको तीव्रता पत्ता लगाउने बित्तिकै मिलिसेकेन्डमै एयरब्याग खुल्छ, जसले चालकको छाती र टाउकोमा हुने सीधा असरलाई कम गर्न सहयोग गर्नेछ ।

ट्राइसिटी ३०० एक थ्री–ह्विलर (तीन पांग्रे) स्कुटर हो, जसमा अगाडि दुईवटा र पछाडि एउटा पाङ्ग्रा हुन्छ । यसले सडकमा उत्कृष्ट सन्तुलन र पकड कायम राख्छ । यो स्कुटरमा २९२ सीसीको सिंगल–सिलिन्डर, लिक्विड–कुल्ड इन्जिन रहेको छ ।

सुरक्षाका लागि यसमा एबीएस र युनिफाइड ब्रेकिङ सिस्टम दिइएको छ । सिटमुनि दुईवटा हेलमेट अटाउने ठूलो स्पेस यामाहाले ट्राइसिटी ३०० उपलब्ध गराएको छ ।