कस्तो होला यामाहाको इलेक्ट्रिक स्कुटर ?

टु ह्विल निर्माता कम्पनी यामाहा पनि इलेक्ट्रिक सेगमेन्टमा प्रवेश गर्दै इलेक्ट्रिक स्कुटर ल्याउने तयारी गरेको छ । रिपोर्टका अनुसार कम्पनीले आफ्नो पहिलो इलेक्ट्रिक स्कुटर अर्को वर्षको सुरुमा लन्च गर्ने सम्भावना छ ।

यसमा एलईडी लाइट, आरामदायी सिट, अन्डर–सिट स्टोरेज, डिस्क ब्रेक, एबीएस, वाइड टायर, स्मार्टफोन कनेक्टिभिटी, डिजिटल डिस्प्ले जस्ता फिचर दिइनेछ ।

यद्यपि कम्पनीले अहिलेसम्म यसमा जडान गरिने ब्याट्रीको बारेमा कुनै जानकारी दिएको छैन । तर, रिपोर्टका अनुसार यामाहाको यसमा जडान गरिने ब्याट्रीले एक पटक चार्ज गर्दा करिब १०० किलोमिटरको रेन्ज दिने अनुमान गरिएको छ । सो स्कुटरका एक भन्दा बढी भेरिएन्ट ल्याउन सकिने अपेक्षा गरिएको छ ।

यामाहाले इलेक्ट्रिक स्कुटरबाहेक आगामी दिनमा इलेक्ट्रिक बाइक पनि ल्याउने अपेक्षा गरिएको छ । कम्पनीले सन् २०५० सम्ममा आफ्नो पोर्टफोलियोको ९० प्रतिशत विद्युतीकरण गर्ने योजना बनाएको छ ।

यामाहा कम्पनीले नयाँ इलेक्ट्रिक स्कुटर लन्च गरेमा हिरो भिडा, ओला एसवान, एथर ४५० एक्स, बाउंन्स इन्फिनिटी ई१, टीभीएस आईक्युब जस्ता स्कुटरलाई कडा चुनौती दिने अनुमान गरिएको छ ।