एक्सपेङ जी७ ले बनायो कीर्तिमान, ४६ मिनेटमै १० हजार अर्डर

एक्सपेङको नयाँ इलेक्ट्रिक एसयूभी जी७ ले चीनमा गत जुन ११ मा सार्वजनिक भएको केवल ४६ मिनेटमै १० हजार भन्दा बढी प्रि-अर्डर प्राप्त गर्न सफल भई विश्वव्यापी ईभी बजारमा तहल्का मच्चाएको छ।

सो उत्साहजन प्रतिक्रियाले एक्सपेङको प्रविधिमा आधारित नवीनताप्रति उपभोक्ताको पूर्ण विश्वास र उत्सुकतालाई प्रस्ट रुपमा झल्काएको कम्पनीले बताएको छ ।

जी७ मा एक्सपेङद्वारा विकास गरिएको टुरिङ एआई चिप, हुवावेसँगको सहकार्यमा तयार गरिएको ८७ इन्चको एआर–एचयूडी डिस्प्ले, उच्च स्तरीय स्वचालित ड्राइभिङ सुविधा, र ५सी अल्ट्रा-फास्ट चार्जिङ जस्ता अत्याधुनिक प्रविधिहरू उपलब्ध छन्। ७०० किलोमिटरसम्मको अधिकतम रेञ्जका कारण जी७ ले इन्टेलिजेन्ट मोबिलिटीको नयाँ मापदण्डको रूपमा आफूलाई स्थापित गरेको छ।

जी७ ले अन्तर्राष्ट्रिय बजारमा चर्चा बटुलिरहेको छ । तर नेपालमा भने यसको आधिकारिक वितरक सीजी मोटर्सले एक्सपेङको एआई मोबिलिटीको भिजनलाई पहिले नै जी६ को माध्यमबाट भित्र्याइसकेको छ ।

नेपालमा उपलब्ध जी६ मा ओटीए अपडेट, एक्सओएस अपरेटिङ सिस्टम, ८०० भोल्ट चार्जिङ, एसईपीए २.० आर्किटेक्चर जस्ता अत्याधुनिक प्रविधिहरू उपलब्ध छन्, जसले नेपाली सडकमा ईभीको अनुभवलाई अझ स्मार्ट र इन्टेलिजेन्ट बनाउँछ।

स्मार्ट, सुरक्षित र प्रविधिमैत्री इलेक्ट्रिक ड्राइभिङ अनुभवका लागि एक्सपेङको विश्वव्यापी प्रगति र एआई मोबिलिटीको भविष्य नेतृत्व गर्ने प्रतिबद्धता अब नेपालमा साकार हुँदै गरेको सीजी मोटर्सले जनाएको छ ।