ईभी बजारमा होमियो स्मार्टफोन निर्माता शाओमी, देखायो पहिलो इलेक्ट्रिक कार

चाइनिज इलेक्ट्रोनिक्स तथा टेक्नोलोजी जायन्ट शाओमी इलेक्ट्रिक भेइकल (ईभी) को विश्व बजारमा औपचारिक रुपमा प्रवेश गरेको छ । चीनको बेइजिङमा चलिरहेको स्ट्राइड लन्च इभेन्टमा कम्पनीको पहिलो इलेक्ट्रिक कार सार्वजनिक गरिएको छ ।

यसका साथमा आगामी दिनमा विश्वकै टप ५ अटोमेकर बन्ने कम्पनीको चाहनालाई पनि स्पष्ट गरेको छ । सो इभेन्टमा बोल्दै शाओमीका फाउन्डर लेई जुनले आगामी १५ देखि २० वर्ष भित्रमा कठिन परिश्रम गर्दै विश्वकै टप ५ अटोमेकर बन्ने र चीनको अटोमोबाइल उद्योगलाई एक कदम अगाडि बढाउने बताए ।

शाओमी ब्रान्डमा उपलब्ध हुने पहिलो मोडल एसयू७ हुनेछ । चीनको प्रसिद्ध अटोमोबाइल कम्पनी बीएआईसीले यसको उत्पादन गर्नेछ । कुपे स्टाइलको सो इलेक्ट्रिक सेडान कम्पनीको लोकप्रिय स्मार्टफोन ब्रान्ड एमआई जस्तै नेममा उपलब्ध हुनेछ र यो एसयू७, एसयू७ प्रो र एसयू७ म्याक्स गरी तीन भेरिएन्टमा उपलब्ध हुनेछ ।

अटोनोमस ड्राइभिङ क्षमता कम्पनीको सबैभन्दा महत्वपूर्ण विशेषता हुनेछ । यस अनुसार एसयू७ मा सेल्फ पार्किङ, एडेप्टिभ क्रुज कन्ट्रोल जस्ता लिडार बेस्ड अटोनोमस ड्राइभिङ फिचर हुनेछ भने शाओमीको हाइपर ओएस अपरेटिङ सिस्टममा यो चल्ने छ ।

यसको लम्बाई, चौडाई र उचाई क्रमशः ४,९९७, १,९६३ र १४४० एमएम हुनेछ भने ह्विलबेस ३,००० एमएम हुनेछ । शाओमी एसयू७ मा २२० र ४९५ किलोवाट मोटर गरी दुई अप्सन हुनेछ । त्यसैगरी यसको इन्ट्री लेवलमा बीवाईडीको एलएफपी ब्याट्री र टप भेरिएन्टमा क्याटलको ब्याट्री प्याक उपलब्ध हुनेछ ।

यसको अनुमानित रेन्ज ८०० किलोमिटर सम्म हुने बताइएको छ । यद्यपि यसको औपचारिक जानकारी सार्वजनिक गरिएको छैन । त्यसैगरी मूल्य पनि अहिले सार्वजनिक भएको छैन ।