नयाँ रेन्जरोभर इलेक्ट्रिक र ज्यागुअर ईभी लन्च हुन किन भइरहेको छ ढिलाई ?

ज्यागुअर ल्यान्डराेभर (जेएलआर) ले इलेक्ट्रिक रेन्ज रोभर र ज्यागुअर ईभी मोडल लन्च गर्न ढिलाई गरेको छ । कार निर्माताले आफ्ना नयाँ ईभीको परीक्षण र माग बढाउन थप समय दिइरहेको बताएको छ ।

जेएलआरले रेन्जरोभर इलेक्ट्रिकको लागि पर्खिरहेका ग्राहकहरूलाई पत्र लेख्दै डेलिभरीका लागि अर्को वर्षसम्म कुर्न अनुरोध गरेको छ । जवकी कम्पनीले केही समयअघि मात्रै यसै वर्षको अन्त्यदेखि ईभी हस्तान्तरण गर्ने बताएको थियो ।

अमेरिकी राष्ट्रपति डोनाल्ड ट्रम्पको ट्यारिफले हालैका महिनाहरूमा जेएलआरको बिक्रीलाई असर गरेको छ । एकातर्फ बिक्री कम हुँदै जानु र अर्कोतर्फ उत्पादन लागत बढ्दा कम्पनी हाल दोहोरोमा मारमा छ ।

बढ्दो उत्पादन लागत कम गर्न जेएलआरले हालैमात्र ५०० प्रबन्धकहरूको लागि स्वैच्छिक रिडन्डन्सी योजना समेत ल्याएको थियो । जेएलआरले पहिलोपटक सिधै आफैले उत्पादन गरेर ल्याउन लागेको यी ईभीको परीक्षणमा लामो समय लाग्ने भएकाले समयमै लन्च गर्न नसकिएको कम्पनीको भनाइ छ ।

पहिलो इलेक्ट्रिक ज्यागुअरकाे रिब्रान्डिङ पछि उत्पादन सुरु हुने तालिका अगस्ट २०२६ मा तय गरिएको छ । यसको मूल्य १ लाख पाउन्ड भन्दा माथि हुने अपेक्षा गरिएको छ ।

रेन्जरोभर इलेक्ट्रिक बाहेक, कार निर्माताले रेन्जरोभर भेलारको नयाँ इलेक्ट्रिक संस्करणमा पनि काम गरिरहेको छ । डिफेन्डर सब–ब्रान्ड अन्तर्गतको इलेक्ट्रिक मोडल भने २०२७ को अन्त्यतिर उत्पादनमा जाने बताइएको छ ।