गाडीको आरपीएम के हो ? ९० प्रतिशत चालकले नबुझेको महत्वपूर्ण प्राविधिक जानकारी

सवारी साधन सम्बन्धी धेरै प्राविधिक शब्दहरू दैनिक प्रयोगमा आए पनि धेरै चालकहरूलाई तिनको सही अर्थ थाहा नहुने तथ्य विभिन्न अध्ययनले देखाएको छ । तीमध्ये सबैभन्दा धेरै प्रयोग हुने तर कम बुझिने शब्द आरपीएम हो । कार चलाउने अधिकांश मानिसलाई यसको वास्तविक अर्थ तथा कामबारे सही जानकारी नहुन सक्छ ।

कारका ड्यासबोर्डको स्पिडोमिटरको छेउमा देखिने अर्को मिटरलाई ट्याकोमिटर भनिन्छ, जसमा  एक्स१००० आरपीएम वा आरपीएम लेखिएको हुन्छ । यही मिटरमा देखिने अंक नै आरपीएम हो, यसको पूरा रूप रिभोलुसन पर मिनेट हो । यसले इन्जिनले एक मिनेटमा कति पटक घुम्छ भन्ने कुरा सूचित गर्छ । कारको इन्जिन क्र्याङ्कशाफ्ट पिस्टनको गतिका कारण घुम्ने गर्छ र यही क्र्याङ्कशाफ्टले पाङ्ग्रालाई पावर दिन्छ । त्यसैले आरपीएम इन्जिन कति छिटो काम गरिरहेको छ भन्ने अत्यन्तै महत्वपूर्ण संकेत मानिन्छ ।

ट्याकोमिटरको सुई २ मा छ भने, यसको इन्जिन २००० आरपीएममा चलिरहेको छ अर्थात् क्र्याङ्कशाफ्ट एक मिनेटमा २००० पटक घुमिरहेको छ भन्ने बुझ्नुपर्छ । कारको गतिसँगै आरपीएम पनि बढ्ने भएकाले एक्सेलेरेटर थिचेपछि सुई माथितिर उठ्दै जान्छ । अधिकांश सवारी साधनमा ट्याकोमिटर १ देखि ८ सम्मका अंकले बनेको हुन्छ, जसले इन्जिनले अधिकतम ८००० आरपीएम वरिपरि घुम्न सक्ने क्षमता जनाउँछ । सामान्य ड्राइभिङका क्रममा गाडीको आरपीएम प्रायः २००० देखि ३००० बीचमा रहन्छ, जुन इन्जिनको स्वास्थ्यका लागि पनि उपयुक्त मानिन्छ ।

रिपोर्टका अनुसार आरपीएमको सही बुझाइले चालकलाई इन्जिनको लोड, गियर परिवर्तनको सही समय र इन्धन खपतबारे स्पष्ट जानकारी दिन्छ । तर ९० प्रतिशत चालकलाई यसको महत्वबारे जानकारी नहुँदा गाडीको नियमित प्रयोग र दीर्घकालीन टिकाउपनमा अनावश्यक जोखिम उत्पन्न भइरहेको छ ।