के हो आईएमटी गियरबक्स, जान्नुहोस् यसका फाइदा

कार बजारमा मुख्यतया म्यानुअल र अटोमेटिक गरी २ प्रकारका कारहरू उपलब्ध छन् । यद्यपि, टेक्नोलोजीमा निरन्तर प्रगतिको कारण अब बजारमा अन्य विकल्प पनि उपलब्ध भइसकेको छ । हाल बजारमा आईएमटी गियरबक्स पनि आउन थालेको छ । तर धेरैलाई आईएमटी गियरबक्सको बारेमा थाहा नहुन सक्छ ।

आईएमटी भनेको इन्टेलिजेन्स म्यानुअल ट्रान्समिसन हो । यस ट्रान्समिसनमा इन्टेलिजेन्स भनेको उत्कृष्ट फिचर हो । यही कारणले गर्दा आईएमटी गियरबक्स भएका कारमा राम्रो माइलेज हुन्छ । यद्यपि यो गियरबक्स अझै पनि प्रारम्भिक चरणमै छ र यसलाई पूर्ण रूपमा तयार हुन अझै पनि समय लाग्न सक्छ। तर मिडिया रिपोर्टका अनुसार केही कारमा सो गियरबक्स देखिएको छ । सो गियरबक्स आगामी केही वर्षमा उपलब्ध हुन सक्ने अनुमान गरिएको छ ।

आईएमटी गियरबक्स भएका कार ड्राइभ गर्दा क्लच थिच्नु पर्दैन । सो गियरबक्स सेन्सरको मदतले काम गर्छ । कार ड्राइभ गर्दा चालकले थ्रोटल प्याडलबाट दबाब कम गरेपछि यस गियरबक्सका सेन्सरले कार इन्जिनलाई अटोमेटिक न्युट्रलमा राख्छ । यस गियरबक्समा एक्चुएटर प्रयोग गरेर क्लच थिचिन्छ। त्यसपछि चालकले गियर परिवर्तन गरेपछि एक्चुएटरले फेरि क्लच जोड्छ र इन्जिन सुरु हुन्छ। 

आईएमटी गियरबक्समा चालकलाई धेरै थकानको महसुस हुँदैन । साथै ट्राफिक जाममा पनि बारम्बार क्लच थिच्नु पर्ने झन्झटबाट मुक्त भइन्छ । आईएमटी गियरबक्सलाई अटोमेटिक भन्दा सजिलो नियन्त्रण गर्न सकिन्छ। साथै, अटोमेटिक भन्दा कम खर्चिलो पनि हुन्छ ।