यी एसयूभी किन्न भारतमै २१ महिना सम्म पर्खिनु पर्ने, नेपालमा कहिले ?

कार निर्माणमा प्रयोग हुने सेमीकन्डक्टरको अभावका कारण एसयूभीको लागि लामो प्रतीक्षा गर्नु परेको छ । अहिले सेमीकन्डक्टरको अभावका कारण धेरै कार निर्माता कम्पनी संघर्षरत छन् । यसका कारण विभिन्न लोकप्रिय एसयूभी खरिदका लागि लामो प्रतीक्षा गर्नुपरेको छ ।

महिन्द्रा एक्सयूी७०० को अन्य एसयूभीहरू मध्ये सबैभन्दा लामो प्रतीक्षा अवधि छ । सो एसयूभीको केही भेरिएन्टका लागि २१ महिना कुर्नुपर्ने हुन सक्छ । यद्यपि धेरैजसो बुकिङ सामान्यतया केही महिना भित्र पूरा हुन्छ ।

महिन्द्रा थारको पनि धेरै प्रतीक्षा अवधि छ । यसको भेरिएन्टको आधारमा ११ महिनासम्म प्रतीक्षा अवधि छ । विश्वव्यापी चिपको अभाव र बढ्दो उत्पादन लागतका कारण कम्पनीले थार एसयूभीबाट केही फिचर्स हटाएको छ ।

हुन्डाई क्रेटा हाल भारतीय बजारमा सबैभन्दा लोकप्रिय कार मध्ये एक हो र यसको पनि लामो प्रतीक्षा अवधि छ । हुन्डाई क्रेटाका केही भेरिएन्टका लागि ६ महिनासम्म पर्खनु पर्ने हुन्छ । सो एसयूभीको डिजेल भर्सनको लागि सबैभन्दा लामो प्रतीक्षा अवधि रहेको छ ।

त्यस्तै, किया सोनेटको प्रतीक्षा अवधि ३ देखि ६ महिना सम्मको छ । कियाले भारतमा हालसम्म १ लाख ५ हजार युनिट बिक्री गरिसकेको छ । टोयोटा फच्र्युनर भारतीय बजारमा निकै लोकप्रिय एसयूभी हो र हाल यसको प्रतीक्षा अवधि ४ महिनासम्म छ ।

भारतमै यति लामो प्रतीक्षा अवधि भएका कारण महिन्द्रा एक्सयूभी७०० र थार नेपाली बजारमा आउन सकेका छैनन् । त्यसैगरी हुन्डाई क्रेटा, किया सोनेट आदि पनि भने जस्तो भेरिएन्ट र कलरका लागि लामो प्रतीक्षा गर्नुपर्ने अवस्था छ ।