फक्सवागन टिगुवान अब इलेक्ट्रिकमा आउने, यस्तो हुनेछ पावरट्रेन र प्लेटफर्म

जर्मन अटो निर्माता फक्सवागनले अहिले धमाधम इभीको नयाँ मोडल तयार गरिरहेको छ । आइडी सिरिजका इभी निर्माण गरेर युरोपेली बजारमा राम्रो उपस्थिती जनाइरहेको यो व्रान्डले आफ्नो लोकप्रिय एसयूभी टिगुवानलाई इभी अवतारमा ल्याउने तयारी थालिसकेको जनाइएको छ । टिगुवानको इभी अवतारलाई कम्पनीले सन् २०२५ मा लन्च गर्ने योजना बनाएको हो ।

यो नयाँ इभीलाई फक्सवागनले हाल प्रयोगमा आएको एमइवी प्लेटफर्मलाई अझै सुधार गरेर तयार पारेको एमइवी प्लस प्लेटफर्ममा निर्माण गर्ने भएको छ । जुन प्लेटफर्ममा उसले नाम उल्लेख नभइसकेको अर्को सानो इभी एसयूभी र वाँकी तीनवटा नयाँ इभीलाई समेत तयार पार्ने जनाएको छ । यी वाँकी इभी २०२८ भित्र बजारमा आइसक्ने छन् ।

टिगुवानको इभी अवतारबारे कम्पनीले हालसम्म औपचारिक रुपमा कुनै विवरणहरु सार्वजनिक नगरिसके पनि यसमा रियर ह्विल र फोर ह्विल ड्राइभको विकल्प उपलब्ध हुन सक्ने जनाइएको छ । साथै यो नयाँ इभी ५ र ७ सीटरमा उपलब्ध हुनेछ ।

फक्सवागनले यसमा नयाँ प्रविधीको ‘यूनिफाइड ब्याट्री सेल’ लाई प्रयोगमा ल्याउने तयारी गरेको छ । यद्यपी यो नयाँ इभीमा कम्पनीले कुन साइजको ब्याट्री प्रयोग गर्न लागेको हो भन्ने विषयमा भने कुनै जानकारी वाहिर ल्याएको छैन । एमइवी प्लस प्लटेफर्मममा तयार हुने कारण यसको ब्याट्रीलाई एकदमै छिटो चार्ज गर्न सकिने वताइएको छ । यो इभीले सिंगल चार्जमा ५२१ किलोमिटर रेन्ज दिनसक्ने आँकलन गरिएको छ ।