फक्सवागनले ४५० किमी रेन्ज भएको सस्तो इलेक्ट्रिक कार ल्याउने

फक्सवागनले आफ्नो नयाँ आईडी टुअल इलेक्ट्रिक कारको कन्सेप्ट सार्वजनिक गरेको छ । सो कारको रेन्ज र मूल्यको कारणले निकै चर्चा हुने गरेको छ । कम्पनीले यो आफ्नो सबैभन्दा सस्तो इलेक्ट्रिक कार हुने दाबी गरेको छ ।

आईडी टुअलले सिंगल चार्जमा करिब ४५० किलोमिटर रेन्ज दिने कम्पनीको दाबी छ । कारको मूल्य २५ हजार युरो हुनेछ र यो कम्पनीको सबैभन्दा सस्तो इलेक्ट्रिक कार हुनेछ । कम्पनीले यो कार सन् २०२५ सम्ममा युरोपेली बजारमा ल्याउने लक्ष्य राखेको छ ।

रिपोर्टका अनुसार कारमा अपडेट गरिएको ठूलो इन्फोटेनमेन्ट सिस्टम दिइनेछ । यसका साथै कारमा एम्बियन्ट लाइटिङ, लेदर अपहोल्स्ट्री, भ्वाइस कमाण्ड जस्ता फिचर हुनेछ । कारमा लेगरुम स्पेस बढाउन अपफ्रन्ट सिट दिइनेछ । साथै, पछाडिको सिटका लागि कुल्ड ग्लोभबक्स हुनेछ ।

फक्सवागनले यसलाई प्रिमियम श्रेणीमा राखेर युरोपेली बजारमा लन्च गर्ने तयारी गरिरहेको छ । कम्पनीले सो कार भारतलगायत नेपालमा सस्तो मूल्यमा लन्च गरेमा टाटा नेक्सन ईभी, टियागो ईभी र एक्सयूभी ४०० ईभी जस्ता कारले चुनौतीको सामना गर्नुपर्नेछ ।