६६ घण्टामा २७ हजार बुकिङ भएको भियतनामी इलेक्ट्रिक कार

भियतनामी इलेक्ट्रिक कार कम्पनी भिनफास्ट अटोले आफ्नो भीएफ३ कम्प्याक्ट इलेक्ट्रिक एसयूभीको लागि २७ हजार ६४९ युनिट बुकिङ पाएको घोषणा गरेको छ। कम्पनीले ६६ घण्टामा सो बुकिङ प्राप्त गरेको हो । प्रि-अर्डरको लागि प्राप्त भएको रकम फिर्ता नहुने कम्पनीले जनाएको छ ।

भिनफास्ट  भीएफ३ १३ मे देखि १५ मेसम्मका ग्राहकहरुलाई ९२४८ डलर (ब्याट्री सदस्यता सहित) र १२३९० डलर (ब्याट्री सहित) मूल्य तोकेको छ ।

भीएफ३ को ब्याट्री वारेन्टी ८ वर्षको असीमित माइलेज वारेन्टी र ७ वर्ष वा १ लाख ६० हजार किलोमिटरको वारेन्टी दिइएको छ । भीएफ३ कार अगस्ट २०२४ देखि डेलिभर हुने अपेक्षा गरिएको छ। यो वर्ष कम्तिमा २० हजार भीएफ३ कार उपलब्ध हुने अपेक्षा गरिएको छ ।

भीएफ३ को लम्बाइ ३१९० एमएम, चौडाइ १६७८ एमएम र उचाई १६२० एमएम छ। यसको स्टोरेज क्षमता ५५० लिटर छ। यद्यपि ब्याट्री प्याकको बारेमा कम्पनीले हालसम्म कुनै जानकारी दिएको छैन । सो इलेक्ट्रिक मिनी एसयूभीले एक पटक चार्जमा २०० किलोमिटरसम्म यात्रा गर्न सक्ने कम्पनीले दाबी गरेको छ। भीएफ३ विश्व बजारमा इको र प्लस दुई भेरिएन्टमा उपलब्ध छ।

सो इलेक्ट्रिक मिनी एसयूभीमा ठुलो १० इन्चको टचस्क्रिन इन्फोटेनमेन्ट सिस्टम छ, जसले एन्ड्रोइड अटो र एप्पल कारप्लेलाई समर्थन गर्छ। ड्राइभरलाई डिजिटल इन्स्ट्रयुमेन्ट क्लस्टर र टु-स्पोक डिजाइनको साथ मल्टी फङसन स्टेयरिङ ह्विल प्रदान गरिएको छ। यसमा अटोमेटिक क्लाइमेट कन्ट्रोल, ड्युअल एयरब्याग र क्रुज कन्ट्रोल जस्ता फिचर समावेश छ।