जेनजी आन्दोलनमा क्षति भएको मोटर बीमा दाबीको कति भयो भुक्तानी ? यस्तो छ समग्र अवस्था

काठमाडौं - गएको भदौ २३ र २४ गते जेनजी आन्दोलनका क्रममा भएका भौतिक तथा अन्य क्षतिको निर्जीवन बीमा कम्पनीहरूमा ३ हजार ३१६ वटा बीमा दाबी परेको छ । २३ अर्ब ४७ करोड दाबी रकममध्ये हालसम्ममा अग्रिम भुक्तानी समेत गरी ५ अर्ब ४८ करोड २५ लाख दाबी रकम बीमितहरूलाई भुक्तानी गरिएको छ ।

यस अनुसार बीमा प्राधिकरणका अनुसार मोटर बीमातर्फ कुल २ हजार ३२१ वटा बीमा दाबी परेको थियो । मोटर बीमातर्फ रकमको आधारमा ३ अर्ब ४६ करोड १६ लाखमध्ये १ अर्ब ३९ करोड २५ लाख भुक्तानी भएको छ ।

प्राधिकरणका अनुसार १४ वटा निर्जीवन बीमा कम्पनी र ४ वटा लघु निर्जीवन बीमा कम्पनीहरूबाट अग्रिम भुक्तानी समेत गरी भुक्तानी भएको कूल दाबी रकममध्ये सम्पत्ति बीमातर्फ कूल ७१२ वटा बीमा दाबीको रकम १९ अर्ब ५ करोड रहेको छ । जसमा हालसम्म ३ अर्ब ९३ करोड ५९ लाख भुक्तानी गरिएको छ ।

यसैगरी, इञ्जिनीयरिङ तथा ठेक्का जोखिम बीमातर्फ कूल २२६ वटा बीमा दाबीको करिब ५५ करोड ३९ लाख दाबी रकममध्ये ८ करोड ३६ लाख, परिवहन बीमातर्फ कूल १२ वटा बीमा दाबीको  १ करोड ६९ लाख दाबी रकममध्ये १ करोड ५५ लाख र अन्य बीमातर्फ कूल ४५ वटा बीमा दाबीको ३८ करोड ४० लाख दाबी रकममध्ये  ५ करोड अग्रिम भुक्तानी समेत गरी दाबी रकम भुक्तानी भएको छ ।

आन्दोलनका क्रममा भएका भौतिक तथा अन्य क्षतिको बीमा दाबी भुक्तानीका लागि नेपाल पुनर्बीमा कम्पनीले निर्जीवन बीमा कम्पनीहरूलाई कूल ३ अर्ब २ करोड अग्रिम भुक्तानी सहित पुनर्बीमा दाबी भुक्तानी गरेको छ ।

नेपाल पुनर्बीमा कम्पनीमा विभिन्न १४ वटा निर्जीवन बीमा कम्पनीहरूबाट परेका कूल २ हजार ८६३ वटा पुनर्बीमा दाबीको कूल पुनर्बीमा दाबी रकम १६ अर्ब ६२ करोड ६६ लाख रहेको प्राधिकरणले जनाएको छ ।