टाउकोमा चोट लाग्दा १८ लाख सम्म खर्च हुने गरेको अध्ययन प्रतिवेदन सार्वजनिक

सातौ युएन ग्लोबल रोड सेफ्टी विकको सन्दर्भमा अति नै संवेदनशील बनिरहेको मोटरसाइक्लिस्ट सुरक्षा सम्बन्धी टाउकोको चोटपटक र हेल्मेटको महत्व बारे अध्ययन प्रतिवेदन हालै काठमाडौँमा सार्वजनिक गरिएको छ ।

अन्तर्राष्टिय अटोमोबाइल फेडरेसन (एफआईए) र नेपाल अटोमोबाइल्स एसोसिएसनको सहयोगमा तयार पारिएको सो अध्ययन प्रतिवेदन डा. पुष्प राज पन्त, डा. समन अर्याल, ई. सुयोग खनाल, सुवास भट्टराई र ईश्वर बल्लभ उप्रेतीको समूहले तयार पारेको हो ।

प्रतिवेदनमा २०७९ सालको वैशाख, जेठ र असार महिनामा काठमाडौको ट्रमा सेन्टर, शहिद स्मारक र मनमोहन मेमोरियल अस्पतालमा सडक दुर्घटनामा घाइते भएका ४१९ जनाको अध्ययन समेटिएको छ ।

अध्ययन अनुसार कुल ४१९ घाइते मध्ये मोटरसाइकल र दुई पांग्रे सवारीसाधन प्रयोगकर्ता सबै भन्दा बढी ३४९ घाइते भएका थिए । ती मध्ये २३२ (६६ प्रतिशत) चालकको रुपमा रहेका थिए । त्यसैगरी घाइते भएका ७३ जना चालकको पछाडि बस्ने पिलियन राइडरको रुपमा रहेका थिए भने ४४ जना पैदलयात्रुको संलग्नता थियो ।

२३२ मोटरसाइकल चालकहरू मध्ये १४ प्रतिशतलाई टाउकोमा चोटपटक भएको थियो भने ५५ प्रतिशतको हात खुट्टामा चोटपटक भई उपचार गरिएको थियो ।

त्यसैगरी ७३ पिलियन राइडर मध्ये ३७ प्रतिशतको टाउकोको, ३८ प्रतिशतको हात खुट्टाको र १ प्रतिशतको स्पाइनल चोटहरूको लागि उपचार गरिएको थियो ।

टाउकोमा चोट लागेको ६२ जना घाइतेहरु मध्ये एकजनाको मृत्यु भएको थियो, एक कोमामा, दुई स्थायी रूपमा घाइते, तीन उपचारार्थ र ५५ जनाको निको भएको थियो । सबै प्रकारका चोटहरूमा पुरुषको संख्या बढी थियो ।

टाउकोमा चोट लागेका बिरामीहरूको उपचार निम्ति ३ हजार देखि १८ लाख रुपैयाँ सम्म खर्च लागेको सो अध्ययनले देखाएको छ भने घाइतेहरु औसतमा २३ दिन अस्पतालमा उपचारको निम्ति बसेका देखिन्छन् ।

यसले पीडितहरुको आर्थिक, सामाजिक तथा व्यक्तित्व विकासमा समेत अकल्पनिय असर परेको दर्शाउँछ ।

प्रतिवेदनले दुई पांग्रे सवारी साधन प्रयोग गर्दा राइडर र पिलियन राइडर दुबैले गुणस्तरीय हेल्मेटको सही प्रयोगले टाउकोमा हुन सक्ने चोटपटकको सम्भावना निकै कम हुने देखाएको छ । साथै सडक दुर्घटना पश्चात गरिने आपत्कलीन उद्दारका वर्तमान अवस्थालाई पनि सुधार गर्नुपर्ने कुरा औल्याएको छ ।