अब ४० किलोवाटको ब्याट्रीयुक्त टाटा नेक्सन ईभी आउने, रेन्ज पनि बढ्ने

टाटा नेक्सन ईभी अझै अपडेट भएर आउने भएको छ । सन् २०२२ को मध्य सम्ममा बजारमा उपलब्ध हुने अपडेटेड नेक्सन ईभीमा पहिले भन्दा ठूलो ब्याट्री प्रयोग हुनेछ भने यसले रेन्ज पनि धेरै दिनेछ ।

नयाँ नेक्सन ईभीमा ४० किलोवाट आवरको ब्याट्री प्रयोग गरिने छ । हालको मोडलमा ३०.२ किलोवाट आवरको ब्याट्री प्रयोग गरिएको छ । यसका कारण यसको रेन्ज पनि करिव ४ सय किलोमिटर भन्दा बढी रेन्ज दिनेछ । हालको मोडलले ३१२ किलोमिटरको रेन्ज दिने बताइएको छ । यद्यपि व्यावहारिक रुपमा यो भन्दा कम रेन्ज नै पाइएको छ ।

यी सबैका कारण फ्लोरप्यानमा परिवर्तन गर्न र ठूलो ब्याट्री एड्जस्ट गर्नका लागि बुट स्पेसमा कमी गरिने छ । रिपोर्ट अनुसार टाटा नेक्सन ईभीलाई रि–जेन मोडका साथ बजारमा उतारिने छ, जसले ड्राइभरको रिजेनेरेटिभ ब्रेकिङको तीव्रतालाई एड्जस्ट गर्नेछ । यसबाट कारको रेन्जमा पनि सुधार हुनेछ । नयाँ मोडलमा अलोय ह्विल र ईएसपी उपलब्ध हुने समेत सम्भावना छ ।

नेपाली बजारमा तीन भेरिएन्टमा नेक्सन ईभी उपलब्ध छ । यसको मूल्य क्रमशः ३६ लाख ९९ हजार, ३८ लाख ९९ हजार र ४० लाख ९९ हजार रुपैयाँ छ । भारतीय बजारमा यसको मूल्य १७ लाख देखि १८ लाख भारु सम्म छ ।

अपडेट भएर आयो भने यसको मूल्यमा ३ लाख देखि ४ लाख भारु बढ्ने अनुमान गरिएको छ । यसो भयो भने नयाँ नेक्सन ईभीले हाल बजारमा उपलब्ध हुन्डाई कोना र एमजी जेडएस ईभीसँग प्रतिस्पर्धा गर्नेछ ।

टाटा मोटर्सले इलेक्ट्रिक भेइकलकै क्षेत्रमा कार्य गर्न आधिकारिक रुपमा ७ अर्ब भारीको सुरुवाती पुँजीका साथ टाटा प्यासेन्जर इलेक्ट्रिक मोबिलिटी लिमिटेड (टीपीईएमएल) नामक एक नयाँ इकाई समेत गठन गरेको छ । आगामी वित्त वर्ष २६ सम्म १० इलेक्ट्रिक सवारी साधन बजारमा उपलब्ध गराउने योजना समेत टाटा मोटर्सले बनाएको छ ।