टाटा नेक्सन ईभी अझै अपडेट भएर आउँदै, थप फिचरका साथ बढी रेन्ज दिने

भारतीय कार निर्माता कम्पनी टाटा मोटर्सले लोकप्रिय इलेक्ट्रिक कार नेक्सन ईभीलाई अझै अपडेट मोडलका साथ बजारमा उतार्ने तयारी गरिरहेको छ । यसको वारेमा नयाँ नयाँ जानकारी सार्वजनिक भइरहेका छन् । त्यसैगरी धेरै पटक यो परीक्षण गरेको समेत देखिएको छ ।

हालै यसको नयाँ स्पाई इमेज सार्वजनिक भएको छ र नयाँ जानकारी पनि थाहा भएको छ । नयाँ इमेजका अनुसार यसमा ४ डिस्क ब्रेक हुनेछन् । त्यसैगरी यसमा पहिले भन्दा धेरै रेन्ज दिने ब्याट्री हुनेछ, जुन ४० किलोवाट आवरका साथ उपलब्ध हुनेछ ।

कम्पनीले सो कार आगामी मार्च महिनामा लन्च गर्ने सम्भावना छ । हाल टाटा नेक्सन ईभी भारतका साथै नेपालमा समेत लोकप्रिय छ । पहिलेको मोडल र नयाँ मोडल साथसाथै बिक्री गरिने छ । हालको मोडलले सिंगल चार्जमा ३१२ किलोमिटरको रेन्ज दिन्छ ।

टाटा नेक्सन ईभीमा परमनेन्ट म्याग्नेट एसी मोटर दिइएको छ । यसमा पावरका लागि लिथियम आयोन ब्याट्री उपलब्ध छ, जुन लिक्विडकुल्ड र आईपी६७ सर्टिफाइड छ । यसको अर्थ यसलाई पानी र धुलो दुवैले केही असर गर्दैन ।

नेक्सन ईभीमा ३०.२ किलोवाट आवरको ब्याट्री छ, जसले सिंगल चार्जमा ३१२ किमी रेन्ज दिन्छ । यसको नयाँ इलेक्ट्रिक पावरट्रेनले २४५ एनएमको पिक टर्क जेनेरेट गर्छ । यसले ९.९ सेकेन्डमा ० देखि १०० किमी प्रतिघण्टाको गति लिन सक्छ ।

नेपाली बजारमा पनि टाटा नेक्सन ईभी उपलब्ध छ । यद्यपि कम्पनीले बुकिङ गर्ने ग्राहकलाई समयमै कार उपलब्ध गराउन सकेको छैन । बढ्दो मागका कारण यसको डेलिभरीका लागि केही समय पर्खिनु पर्ने हुन्छ ।

नेपाली बजारमा तीन भेरिएन्टमा टाटा नेक्सन ईभी उपलब्ध छ । यसको मूल्य ३६ लाख ९९ हजार, ३८ लाख ९९ हजार र ४० लाख ९९ हजार रुपैयाँ छ ।