विस्तारित हुँदैछ टु ह्विलरको बजार, अबको १० वर्षसम्म वार्षिक ३ लाखको दरले बिक्री हुने प्रक्षेपण

पछिल्लो केही वर्षयता टु ह्विलको बजार तीव्र दरमा वृद्धि भैरहेको छ । यातायात व्यवस्था विभागको तथ्यांकलाई हेर्दा हालसम्म ३३ लाख बढी टु ह्विलर दर्ता भएका छन् । ५ बर्षअघि उक्त संख्या २० लाख हाराहारीमा रहेको थियो । यस हिसावले हेर्दापनि पछिल्लो ५ वर्षयता औसत वार्षिक ३ लाख हाराहारीले टु ह्विलर साधनको बिक्री भएको देख्न सकिन्छ ।

केही वर्षअघिसम्म यस्ता साधनको बिक्री ठूला सहरमा बढी केन्द्रित रहँदै आएकोमा पछिल्लो समय दुरदराजका ग्रामीण भेगमा समेत विस्तार भैरहेको छ । पूर्वाधार निर्माणले गति लिएका कारण पनि यी क्षेत्रमा टु ह्विलरको बजारले गति लिन थालेको हो । ५ बर्षअघिसम्म कुल बिक्री हुने टु ह्विलरको ७० प्रतिशत काठमाडौं उपत्यकासहित केही ठूला सहरहरुमा हुने गरेको र बाँकी ३० प्रतिशतको बजार अन्य साना सहरहरुमा रहँदै आएको थियो । तर अहिले यो समीकरण ठिक उल्टो हुँदै गएको र फलरुवरुप ७० प्रतिशत बाहिर र ३० प्रतिशत उपत्यका लगायत केही ठूला सहरहरुमा हुने गरेको विभिन्न तथ्यांकहरुले देखाएको छ । यो समीकरण अबको केही वर्षसम्म रहिरहने र विस्तारै टु ह्विलरको बजार ग्रामीण भेग केन्द्रित हुँदै जाने देखिन्छ ।

ठूला सहरमा सवारीसाधनको चाप अत्याधिक बढ्नु, यो क्षेत्रमा बसोबास गर्ने मानिसहरु विस्तारै टु ह्विलरबाट फोर ह्विलरमा अपग्रेड हुँदै जानु र अर्कोतर्फ ग्रामीण भेगमा पूर्वाधारको विकासले तिव्रता पाउँदै जानु लगायत कारणले पनि टु ह्विलरको बजारले नयाँ गन्तव्यमा बजार बढाउँदै जाने देखिएको हो । यी भेगमा यस्ता साधनको बिक्री बढाउन रेमिट्यान्सले समेत ठूलो भुमिका खेलिरहेको छ ।

रोजगारीका लागी खाडीलगायत अन्य मुलुकमा जाने ब्यक्तिको संख्या ग्रामीण भेगबाटै बढी हुने कारण अहिले यी क्षेत्रमा नगदको प्रवाह समेत निकै राम्रो देखिएको छ । जसको सिधा असर टु ह्विलर बिक्रीमा देखिन थालेको हो । जसले गर्दा पनि अबको १० बर्षसम्म ग्रामीण भेगमा टु ह्विलरको माग उच्च गतिमा बढ्ने स्वयं व्यवसायीहरुले समेत आँकलन गरेका छन् ।

नेपालका लागि यामाहा मोटरसाइकलको आधिकारिक वितरक एमएडब्लु इन्टरप्राइजेजका सीईओ राजु क्षेत्री टु ह्विलरको बजार काठमाडौंबाट बाहिरी सहरहरुमा स्थान्तरण हुँदै गएको स्विकार्छन् । उनी भन्छन, ‘अहिले काठामाडौं बाहिरको बजारमा मोटरसाइकल र स्कुटरको माग बढी रहेको छ । जसका कारण आयातकर्ता कम्पनीहरुले समेत यी क्षेत्रमा शोरुमलगायत बिक्री पछिको सेवा उपलब्ध गराउने सर्भिस सेन्टर र स्पेयर पार्ट्सको सञ्जाल विस्तार गरिरहेका छन् ।’ एकातर्फ नयाँ गन्तव्यमा यस्ता साधनको बजार बिस्तार हुँदै जाने र अर्को तर्फ नयाँनयाँ मोडलका साधन भित्रिदै जाँदा पुरानोबाट अपग्रेड भएर नयाँ साधन खरिद गर्ने ग्राहक समेत बढ्ने देखिन्छ ।

यसले पनि अबको एक दशकसम्म नेपालमा वार्षिक ३ लाखको दरले टु ह्विलरको बजार बढ्ने देखिएको हो । हाल दर्ता भएको सवारीसाधनलाई आधार मानेर करिब ३ लाख मोटरसाइकल तथा स्कुटर काम नलाग्ने अवस्थामा रहेको अनुमान गर्दा पनि अहिले सडकमा ३० लाख हाराहारीको संख्यामा टु ह्विलर गुडिरहेका छन् । यसको ५ प्रतिशतमात्र एक्सचेन्जमा जाने हो भनेपनि वार्षिक १ लाख ५० हजार नयाँ मोटरसाइकल यसैबाट बिक्री हुने र बाँकी १ लाख ५० हजार नयाँ ग्राहक थपिने क्षेत्रीले प्रक्षेपण गरेका छन् । यसकै आधारमा पनि टु ह्विलरको बिक्री अबको एक दशकसम्म ३ लाखबाट तल नझर्ने देखिन्छ ।