नेपाली बजारमा थपियो अर्को इलेक्ट्रिक स्कुटर ब्रान्ड : कोमाकीका दुई इलेक्ट्रिक स्कुटर उपलब्ध

काठमाडौं – नेपाली बजारमा भारतीय इलेक्ट्रिक ब्रान्ड कोमाकीका दुई इलेक्ट्रिक स्कुटर एसई र भेनिस उपलब्ध हुने भएका छन् । नेपालका लागि आधिकारिक वितरकको रुपमा युनिटी ट्रेडिङ कन्सर्न प्रालिले यी स्कुटर भित्र्याउन थालेको बताएको छ ।

दुवै स्कुटरमा ३ हजार वाटको मोटर छ । एसईले ५ हजार २ सय र भेनिसले ४ हजार ९ सय वाटको पिक पावर दिन्छ । एसईमा ७४ भोल्ट ४० एएच र भेनिसमा ७२ भोल्ट ४० एएचको लिथियम आयोन ब्याट्री छ । सिंगल चार्जमा एसईले १४० किलोमिटर र भेनिसले १२० किलोमिटरको रेन्ज दिने बताइएको छ । ब्याट्रीलाई ४ घण्टा चार्ज गर्न सकिन्छ ।

एसईमा ड्युअल डिस्क ब्रेक र भेनिसमा सीबीएस सहितको ड्युअल डिस्क ब्रेक छ । एसईको टप स्पिड ७० र भेनिसको टप स्पिड ८५ किलोमिटर छ । १२५ सीसी स्कुटर बराबरको पावर यी स्कुटरले दिने बताइएको छ । कोमाकी एसई ३ वटा कलर र भेनिस ६ वटा कलरमा उपलब्ध हुनेछ ।

यी स्कुटरमा रिजेनेरेटिभ ब्रेकिङ, रिभर्स असिस्ट, क्रुज कन्ट्रोल, पार्किङ असिस्ट, सेल्फ डायग्नोसिस, रिपेयर स्विच, मोबाइल चार्जिङ प्वाइन्ट, ब्लुटुथ स्पिकर, एन्टी थेफ्ट लक, साइड स्ट्यान्ड सेन्सर, प्यासेन्जर फ्लोर बोर्ड आदि विशेषता उपलब्ध छ ।

कोमाकी एसईको मूल्य २ लाख ९५ हजार र कोमाकी भेनिसको मूल्य ३ लाख १० हजार रुपैयाँ तोकिएको छ । हाल सुरुवाती अफरको रुपमा पहिलो २० ग्राहकलाई २० हजार रुपैयाँ छुट उपलब्ध हुनेछ भने एक्सचेन्ज गर्नेका लागि २० हजार थप भ्यालुएसन गरिने छ । त्यसैगरी निःशुल्क एसेसरिज र हेल्मेटका साथै फाइनान्समा शून्य प्रतिशत ब्याजदरको सुविधा समेत उपलब्ध छ ।

बालुवाटारमा चिनियाँ राजदुतावास नजिकै कोमाकीको शोरुम स्थापना गरिएको छ । शोरुममा पुगेर स्कुटरको टेस्ट राइड समेत गर्न सकिने युनिटी ट्रेडिङ कन्सर्नका म्यानेजर उमेश अधिकारीले बताए । केही दिनमै यो स्कुटरको औपचारिक लन्च गरिने उनले बताए । कोमाकीका इलेक्ट्रिक स्कुटर भारतमा निकै नै रुचाइएको र नेपालमा समेत रुचाइने अपेक्षाका साथ यसलाई भित्र्याएको उनले बताए ।

नेपाली बजारमा यो भन्दा पहिले युनिटी ट्रेडिङ कन्सर्नले ई–मोटार्ड र बिइङ ह्युमन साइकल समेत बिक्री–वितरण गर्दै आएको छ ।