पल्सरको प्रतिस्पर्धामा टीभीएसले ल्याउने भयो फिएरो १२५ बाइक

स्पोर्ट्स सेगमेन्टमा १२५ सीसी बाइकको बढ्दो लोकप्रियतालाई मनन गरी टीभीएस समेत १२५ सीसी बाइक लन्च गर्ने योजनामा रहेको संकेत देखिएको छ । हाल बजारमा बजाज, हिरो, होन्डा जस्ता कम्पनीका १२५ सीसीका स्पोर्ट्स बाइकको माग बढ्दो छ ।

टीभीएसले हालै फिएरो १२५ र टीभीएस फिएरो १२५ को ट्रेडमार्क दर्ता गराएको छ । यसका आधारमा केही नयाँ कुरा हुँदैछ भन्ने अनुमान धेरैले गरेका छन् ।

टीभीएसको सो नयाँ बाइकको नाम टीभीएस फिएरो १२५ हुने र अर्को वर्षको अगस्त महिना सम्म लन्च हुने अनुमान गरिएको छ । पहिले पनि फिएरो बाइक बजारमा उपलब्ध थियो । सुजुकी र टीभीएसको सहकार्यमा उपलब्ध सो बाइक भने १५० सीसी सेगमेन्टमा उपलब्ध थियो । तर पछि यसको उत्पादन बन्द गरिएको थियो ।

अब टीभीएसले बजाज पल्सर १२५, होन्डा सीबी साइन एसपी १२५ र हिरो ग्ल्यामर जस्ता १२५ सीसी बाइकलाई टक्कर दिने गरी टीभीएस फिएरो १२५ लन्च गर्न सक्ने छ । फिचरको मामिलामा यो अपग्रेडेड र अझै राम्रो हुनेछ ।

टीभीएस फिएरो १२५ मा एयरकुल्ड इन्जिन हुनेछ । सो इन्जिनले ९.३८ पीएसको पावर र १०.५ एनएमको टर्क जेनेरेट गर्नेछ । बीएस ६ मापदण्डयुक्त सो इन्जिनमा पाँच गियरबक्स हुनेछ भने अघिल्लो भागमा डिस्क र पछिल्लो भागमा ड्रम ब्रेक हुनेछ । आगामी दिनमा यसको वारेमा थप फिचर सार्वजनिक हुने नै छ ।

पहिले बजारमा उपलब्ध फिएरोमा आकर्षक हेडल्याम्प र भाइजर थियो । यसका आधारमा आगामी दिनमा आउने फिएरोको फ्रन्ट लुक पनि निकै नै आकर्षक हुने अनुमान गरिएको छ । यसका आधारमा फिएरोले अन्य कम्पनीका बाइकसँग प्रतिस्पर्धा गर्न सक्ने छ ।

टीभीएसले कुनै समयमा १२५ सीसी सेगमेन्टमा टीभीएस फ्लेम १२५ बाइक लन्च गरेको थियो । तर यो धेरै प्रचलित भएन । हाल १२५ सीसी सेगमेन्टमा बजाज पल्सरको धेरै चर्चा छ । त्यसैगरी होन्डा साइन र हिरो ग्ल्यामर जस्ता बाइक छन् । यदि टीभीएसले फिएरो १२५ ल्यायो भने पक्कै पनि नयाँ प्रतिस्पर्धि थपिने अनुमान गर्रिएको छ ।