यस्तो हुनेछ नेपालमा टीभीएस इलेक्ट्रिक स्कुटर आईक्युबको मूल्य

काठमाडौं – टीभीएसको इलेक्ट्रिक स्कुटर आईक्युब नेपाली बजारमा कहिले लन्च होला भनेर धेरैले चासो राखिरहेको अवस्थामा यसको मूल्य सार्वजनिक भएको छ । नेपालका लागि टीभीएसको आधिकारिक वितरक जगदम्बा मोटर्सले अन्य मोटरसाइकल र स्कुटरको साथमा सो इलेक्ट्रिक स्कुटरको मूल्य समेत संलग्न गरी एक दैनिक पत्रिकामा मूल्य सूची प्रकाशित गरेको छ ।

सो अनुसार टीभीएस आईक्युबको मूल्य ४ लाख २९ हजार ९ सय रुपैयाँ तोकिएको छ । यद्यपि कम्पनीले स्कुटर लन्च गर्ने समय सम्म यो मूल्य परिवर्तन पनि हुन सक्ने अनुमान गर्न सकिन्छ । सार्वजनिक गरिए अनुसार टीभीएस आईक्युबमा ४.४ किलोवाटको मोटर हुनेछ ।

टीभीएस आईक्युब इलेक्ट्रिक स्कुटर भारतमा लन्च भएको लामो समय भए पनि नेपाली बजारमा भने उपलब्ध भएको छैन । जगदम्बा मोटर्सले सो इलेक्ट्रिक स्कुटर हाल परीक्षण भइरहेको बताएको छ । मूल्य सूची सार्वजनिक भएसँगै यसको लन्चिङ समय पनि नजिकिएको अनुमान गरिएको छ ।

सो इलेक्ट्रिक स्कुटर ४.२ सेकेन्डमा ४० किलोमिटर प्रतिघन्टाको स्पिडको रेन्ज लिने क्षमताको रहेको छ । सो स्कुटरको टप स्पिड ७८ किलोमिटर प्रति घन्टा रहेको छ । यसमा २.२४ केडब्ल्युएच क्षमताको लिथियम आयोन व्याट्री प्याक रहेको छ । फुल चार्जिङमा सो स्कुटरले ७५ किलोमिटरको दुरी तय गर्छ । उक्त व्याट्री फुल चार्ज हुनको लागि ५ घन्टाको समय लाग्छ ।

फिचरको लागि सो स्कुटर कम्पनीको नेक्स्ट जेनेरेशन टीभीएस स्मार्टएक्स्कनेक्ट प्लेटफर्मको साथमा उपलब्ध हुनेछ । यसको साथै यसमा एड्भान्स टीएफटी क्लस्टर र टीभीएस आईक्युब एप उपलब्ध रहेको छ ।

सो स्कुटरमा जियो फेसिङ, नेभिगेसन असिस्ट, रिमोट व्याट्री, चार्ज स्टेटस, लास्ट पार्क लोकेसन, इनकमिङ कल अलर्ट/एसएमएस अलर्ट, डे र नाइट डिस्प्ले, क्यु पार्क असिस्ट, मल्टी सेलेक्ट इकोनोमी र पावर मोड तथा रिजनरेटिभ ब्रेकिङ जस्ता इनोभेटिभ फिचर रहेको छ ।