ट्रायम्फले भारतमा बेच्यो १ लाख युनिट मोटरसाइकल, नेपालमा लोकप्रिय बन्दै

ट्रायम्फले भारतमा १ लाख युनिट मोटरसाइकल बिक्री गरेर एक प्रमुख माइलस्टोन पार गरेको छ । यो घोषणा देशमा उत्पादन र वितरणको लागि जिम्मेवार ट्रायम्फको रणनीतिक साझेदार बजाज अटोले गरेको हो ।

२०२३ को दोस्रो त्रैमासिकमा बजाज–ट्रायम्फ साझेदारी सुरु भएको लगभग २.५ वर्ष पछि कम्पनीले यो उपलब्धी हासिल गरेको हो । बजाज अटोका अनुसार यस उपलब्धीले भारतीय बजारमा प्रिमियम मोटरसाइकल ब्रान्डको द्रुत वृद्धिलाई प्रकाश पारेको छ ।

साझेदारी सुरु भएदेखि ट्रायम्फले बजाज अटोका उत्पादन क्षमता, अनुसन्धान र विकास विशेषज्ञता र व्यापक वितरण नेटवर्कको लाभ उठाएर भारतमा आफ्नो उपस्थिति उल्लेखनीय रूपमा विस्तार गरेको छ । हाल ट्रायम्फको उपस्थिति भारतभरका २०० भन्दा बढी शहरमा फैलिएको छ, जसलाई २३० भन्दा बढी डिलरशिप र स्टोरहरूको नेटवर्कले समर्थन गरेको छ ।

भारतमा उत्पादित ट्रायम्फको ४०० सीसी लाइनअपका मोटरसाइकलले घरेलु माग पुरा गर्नुको साथै अन्तर्राष्ट्रिय बजारमा समेत बलियो उपस्थिती जनाएको छ । हाल, भारतमा निर्मित ट्रायम्फ मोटरसाइकल नेपाल, जापान, अष्ट्रेलिया, मेक्सिको, ताइवान र दक्षिण कोरिया सहित विश्वभरका १८ देशहरूमा निर्यात हुँदै आएको छ।

कम्पनीले भारतमा आफ्नो पोर्टफोलियोलाई थप विस्तार गर्ने तयारी गरिरहेको छ । हालै, बजाज अटोका एमडी तथा सीईओ राजीव बजाजले अप्रिलमा ट्रायम्फ ३५० सीसी मोटरसाइकलहरूको नयाँ रेन्ज लन्च हुने पुष्टि गरेका छन् ।

ट्रायम्फ नेपाली बजारमा समेत लोकप्रिय बनिरहेको मोटरसाइकल ब्रान्ड हो । नेपाली बजारमा यसले एक प्रिमियम मोटरसाइकलका रुपमा आफ्नो छबी वलियो बनाउँदै लगेको छ । स्पिड ४००, स्क्र्याम्बलर ४०० एक्स र स्क्र्याम्बलर ४०० एक्ससी गरी कुल तीन भेरिएन्टमा उपलब्ध यी बाइकको मूल्य क्रमशः ६ लाख ६० हजार, ७ लाख १५ हजार र ८ लाख रुपैयाँ पर्छ ।