फिटनेस ठिक नभएका १८ सुमो प्रहरी नियन्त्रणमा

ट्राफिक प्रहरी प्रमुखमा डिआइजी मिरा चौधरी आएपछि सवारीसाधनको फिटनेस चेकिङमा कडाई हुन थालेको छ । सोही क्रममा हिँजो काठमाडौंको बल्खुमा टाटा सुमोको फिटनेस चेकजाँच गरिएको थियो । चेकिङका क्रममा अवस्था ठिक नभएका १८ ओटा टाटा सुमोलाई ट्राफिक प्रहरीले नियन्त्रणमा लिएको छ ।

ह्याण्ड ब्रेक नभएका, टायरको अवस्था ठिक नभएका लगायत सवारीको विविध यान्त्रिक अवस्था ठिक नभएका १८ ओटा टाटा सुमो जीपलाई नियन्त्रणमा लिइएको हो ।

नियन्त्रणमा लिइएका सुमोमा यात्रा गर्न तयार यात्रीलाई अन्य सवारी साधनबाट गन्तव्य स्थानतर्फ पठाइएको उपत्यका ट्राफिक प्रहरीले जनाएको छ । बल्खुबाट देशका विभिन्न स्थानका लागि सुमो जीप छुट्दै आएका छन् ।

यात्रुहरुको सुरक्षालाई मध्यनजर गरेर ट्राफिक प्रहरीले केही समययता सवारी साधनको अवस्था चेकजाँच गर्दै आइरहेको छ ।