ट्राफिक नियम उल्लंघन गरेमा अब चिट काट्ने होइन एसएमएस आउने

काठमाडौं – कुनै सवारी धनीले ट्राफिक नियम उल्लंघन गरेमा अब मोबाइलमा एसएमएसमार्फत जरिवानाको जानकारी आउने भएको छ । यातायात व्यवस्था विभागले हाल प्रचलनमा रहेको कागजी चिटको चलनलाई हटाएर नयाँ व्यवस्था गर्ने भएको छ ।

विभागका महानिर्देशक नमराज घिमिरेले यसका लागि आवश्यक एप तयार गर्ने कार्यमा विभाग लागेको बताएका छन् । यसका लागि अध्ययन अगाडि बढेको र प्रतिवेदन तयार भए पछि प्रक्रिया अगाडि बढ्ने छ ।

कसैले नियम उल्लंघन गरे एपमा सवारी साधनको विवरणसहित कसुर अपलोड गर्नेछन्। उक्त विवरण सिधै ट्राफिक प्रहरीको सिस्टममा जान्छ। सिस्टमले चालकलाइ कारबाहीमा परेको जानकारीसहितको एसएमएस पठाउने छ ।

सवारी साधनमा इम्बोस्ड नम्बर प्लेट भए झन् यो कार्य सहज हुनेछ । इम्बोस्ड नम्बर प्लेटमा राखिएको चिप्समा सवारी साधनदेखि चालकसम्मको विवरण हुन्छ। ट्राफिक प्रहरीलाइ उक्त चिप रिड गर्न सक्ने मेसिन दिइएको हुन्छ। शहरका विभिन्न स्थानमा चिप रीड गर्न सक्ने मेसिन सहितको गेटहरु राख्ने योजना छ।

आगामी साउन १ देखि नयाँ र नवीकरण गरिने सबै सवारी साधनमा इम्बोस्ड नम्बर प्लेट जडान गर्ने सरकारी योजना छ । यसो भयो भने ट्राफिक प्रहरीले सवारी साधनलाई कारवाही गर्न पनि सहज हुनेछ ।