आज देखि ट्राफिक जरिवाना क्युआर कोडबाटै तिर्न सकिने, बैंक जानु नपर्ने

काठमाडौँ - महानगरीय ट्राफिक प्रहरी महाशाखाले काठमाडौँ उपत्यकामा ‘क्युआर कोड’को प्रयोग गरी ट्राफिक जरिवाना तिर्न सकिने व्यवस्था गरेको छ।

महानगरीय ट्राफिक प्रहरी महाशाखाले क्युआर कोडको  प्रयोग गरी मोबाइलबाट नै जरिवाना तिर्न सकिने व्यवस्था गरेको जनाएको छ।

महाशाखाले बिहीबार एक कार्यक्रमका बीच यो सेवा शुभारम्भ भएको घोषणा गरेको छ। यो सेवा प्रारम्भ भएसँगै जरिवानाको पैसा तिर्न प्रहरी कार्यालयमा वा बैंंकमा गएर लाइन बस्नुपर्ने बाध्यताको अन्त्य हुने ट्राफिक प्रहरी महाशाखाका प्रवक्ता एसपी सञ्जीव शर्माले बताए। 

शर्माका अनुसार ट्राफिक नियम उल्लङ्घन गर्ने चालकलाई प्रहरीले क्युआर कोड भएको चिट काटेर दिनेछ। त्यही चिटको आधारमा मोबाइलबाट स्क्यान गरेर रकम भुक्तानी गर्न सकिने शर्माले जानकारी दिए। 

महाशाखाले आज शुक्रबारबाट लागू हुने गरी कारबाहीमा परेका सवारीसाधनका चालकहरूले ट्राफिक प्रहरीको चिटमा छापिएका क्युआर कोडमार्फत् रकम भुक्तानी गर्नसक्ने व्यवस्था मिलाएको महानगरीय ट्राफिक प्रहरी महाशाखाका प्रमुख एसएसपी जनक भट्टराईले जानकारी दिए । 

उनका अनुसार आफूसँग सुविधा भए चिटको क्युआर कोडलाई स्क्यान गरेर कारबाहीको रकम भुक्तानी गर्न सकिन्छ । प्रमुख भट्टराईले ट्राफिक प्रहरी अब कारबाही गर्दा डकुमेन्ट नै लिनु नपर्ने प्रविधि विकास गर्न लागिरहेको बताए ।

प्रमुख भट्टराईले क्युआर कोडमार्फत् आफैँ भुक्तानी गर्न मिल्ने व्यवस्था केही दिनका लागि ग्लोबल आइएमई बैङ्कको क्युआर कोडबाट भुक्तानी गर्न सकिने र निकट भविष्यमै अन्य ५० भन्दा धेरै बैङ्क तथा प्रविधिमैत्री बन्दै गएपछि देशभरमा रहेका सबै बैङ्कबाट कारबाहीको रकम भुक्तानी गर्न सकिने बताए ।