टोयोटा नेपालले राइज लन्च गर्दै, बुकिङ खुल्ला

काठमाडौं – नेपाली बजारमा टोयोटाको नयाँ कम्प्याक्ट एसयूभी राइज आउने भएको छ । नेपालका लागि टोयोटाको आधिकारिक वितरक युनाइटेड ट्रेडर्स सिन्डिकेटले टोयोटा राइज आगामी डिसेम्बरमा लन्च गर्ने तयारी गरेको बताएको छ । टोयोटा नेपालको फेसबुक पेजबाट समेत यसको जानकारी सार्वजनिक हुनुका साथै यसको बुकिङ समेत प्रारम्भ भएको कम्पनीले औपचारिक जानकारी दिएको छ ।

राइज १.२ लिटर इन्जिन र १.० लिटर टर्बो इन्जिनमा नेपाली बजारमा उपलब्ध हुनेछ । १.२ लिटर इञ्जिनले ८७ एचपी पावर र ११३ एनएम टर्क प्रदान गर्छ भने १ लिटर टर्बो इन्जिनले ९७ एचपी पावर र १४० एनएम टर्क प्रदान गर्छ । दुवै इन्जिन म्यानुअल र अटोमेटिक ट्रान्समिसन भेरिएण्टमा उपलब्ध हुनेछन ।

यसमा भएको ४.९ मिटर टर्निङ रेडियस र २०० एमएमको ग्राउन्ड क्लियरेन्सले उत्कृष्ट ह्यान्डलिङ तथा यात्रामा हुने असहजतालाई कम गर्न सहयोग गर्छ । गाडीमा ३६ लिटरको फ्युल ट्यांक रहेको छ भने माइलेज सो सेगमेंटमा रहेका अन्य गाडी भन्दा उत्कृष्ट रहने बताइएको छ ।

साथै, गाडीमा रियरभ्यु क्यामेरा सहित फ्रन्ट तथा रियर सोनार र एप्पल कारप्ले तथा एन्ड्रोइड अटो सहितको ७ इन्च इन्फोटेनमेन्ट समेत रहेको छ ।

८ विभिन्न कलरमा उपलब्ध हुने टोयोटा राइजको मूल्य ६६ लाख रुपैयाँ देखि शुरु हुनेछ ।