लामो दूरीको यातायातमा असोज ११ देखि अग्रिम टिकट बुकिङ खुल्ने

काठमाडौं – काठमाडौं उपत्यकाबाट बाहिरिने लामो दूरीका सवारी साधनका लागि आगामी असोज ११ देखि अग्रिम टिकट बुकिङ खुल्ने भएको छ ।

बिहीवार यातायात व्यवसायी, उपभोक्ता अधिकारकर्मी र ट्राफिक प्रहरीसँगको छलफलपछि लामो दूरी चल्ने सवारीसाधनको अग्रिम टिकट बुकिङ खुलाउने निर्णय भएको हो ।

असोज २१ गते घटस्थापना भएको र विगतका वर्षहरुमा जस्तै यो वर्ष पनि अधिकांश यात्रुहरु घटस्थापना पश्चात उपत्यकाबाट बाहिरिने अनुमान गरिएको छ । यही कुरालाई मनन गरी पहिले नै टिकट बुकिङ खुलाउनका लागि यातायात व्यवस्था विभागले पहल गरेको हो ।

अहिले धेरै यातायात व्यवसायी सम्बद्ध कम्पनीहरुले अनलाइन टिकट बुकिङको व्यवस्था गरेकाले अनलाइनमार्फत नै टिकट बुकिङ गर्न सकिने भएको छ ।